Dhule : धुळे महापालिकेत महायुतीचा तिढा कायम! ७४ जागांसाठी रणसंग्राम, भाजपचा ५५ प्लसचा नारा, शिवसेना २१ जागांवर ठाम

भूषण अहिरे, धुळे

राज्यात नुकत्याच स्थानिक स्वराज्य संथांच्या निवडणुका पार पडल्या असून आता जनतेचं लक्ष महानगरपालिकेच्या निवडणुकांकडे लागलं आहे. काही ठिकाणी पक्षापक्षांमध्ये युती होताना पाहायला मिळते आहे. तर काही ठिकाणी जागांसाठी चुरशीची लढत पाहायला मिळते आहे. धुळे महानगरपालिका निवडणूकीत जागा वाटपाचा तिढा सुटावा यासाठी पालकमंत्री जयकुमार रावल यांच्या नेतृत्वाखाली महायुती मधील भाजप आणि शिवसेना पदाधिकाऱ्यांची बैठक संपन्न झाली.

येत्या १५ जानेवारी रोजी महापालिकेच्या निवडणूका होणार असून 74 जगांसाठी धुळे महापालिकेची निवडणुक होत आहे. या निवडणुकीसाठी भाजपच्या वतीने ५५ प्लसचा नारा देण्यात आला आहे. तर शिंदे सेना २१ जागेवर ठाम आहे. सन्मानपुर्वक जागा मिळाल्यातरच महापालिका निवडणुकीत युती होईल अन्यथा स्वतंत्र लढण्याचा इशारा शिवसेनेच्या आमदारांच्या वतीने यापूर्वी देण्यात आला होता.

वरीष्ट पातळीवरुन दोनही पक्षांना युतीबाबत निरोप देण्यात आला आहे. युतीबाबत भाजप आणि शिवसेना पदाधिकाऱ्यांमध्ये प्राथमिक चर्चा देखील झाली होती. मात्र पुढील निर्णय पालकमंत्री घेतील, अशी भूमिका भाजपने घेतली असल्यामुळे धुळ्यातील महायुतीचा तिढा सुटलेला नाही.

पालकमंत्री जयकुमार रावल यांनी भाजप आणि शिवसेना नेत्यांसोबत बैठक करत तिढा सोडवण्याचा प्रयत्न केला आहे, यामुळे महायुती एकत्रित लढतील की आमने सामने रिंगणात उतरतील हे बघणे महत्वाचे ठरणार आहे. दरम्यान राज्यभरात आता सगळ्यांचे लक्ष पालिका निवडणुकीकडे लागले आहे.