Maharashtra Politics: सगळ्यांनी एकनाथ शिंदे बनून काम करा, शिवसेनेकडून सर्व नेत्यांना महत्वाच्या सूचना

Summary -

• एकनाथ शिंदे यांनी आगामी निवडणुकांसाठी आमदार-खासदारांना तयारी करण्याचे आदेश दिले.

• मतदार याद्या अपडेट करण्यासाठी अॅप तयार करण्यात आले असून त्यासाठी प्रशिक्षण दिले जाणार आहे.

• सगळ्यांनी नेतृत्व जपून एकजूट ठेवून काम करावे, असे त्यांचे स्पष्ट मार्गदर्शन आहे.

• युतीला गालबोट लागू नये आणि प्रत्येक जागेची माहिती घेऊन तयारी करावी, अशी सूचना देण्यात आली आहे.

आगामी स्थानिक स्वराज्य संस्थांच्या निवडणुकीच्या तयारीला सर्वच राजकीय पक्षांनी सुरूवात केली. बैठकांवर बैठका आणि भेटीगाठी सुरू झाल्या आहेत. नुकताच उद्धव ठाकरे पदाधिकाऱ्यांना निवडणुकीच्या तयारीला लागा असे आदेश दिले. त्यानंतर आज उपमुख्यमंत्री एकनाथ शिंदे यांनी पक्षांच्या आमदार आणि मंत्र्यांची बैठक घेतली. शिंदेसेनेच्या खासदार आणि आमदारांची जंजिरा या दादा भुसेंच्या निवासस्थानी बैठक पार पडली.

तब्बल दीड तास ही बैठक सुरु होती. या बैठकीला एकनाथ शिंदेंकडून मार्गदर्शन करण्यात आलं. आगामी स्थानिक स्वराज्य संस्थांच्या निवडणुकांसाठी तयारी करण्याचे आदेश एकनाथ शिंदे यांनी या बैठकीतून दिले. जास्तीत जास्त जागा निवडून आणाव्यात, अशा सूचना सर्व आमदार-खासदारांना करण्यात आल्या आहेत. सगळ्यांनी एकनाथ शिंदे बनून काम करावे, असे आदेश एकनाथ शिंदे यांनी दिले.

एकनाथ शिंदे यांनी या बैठकीमध्ये सर्वा आमदार आणि खासदारांना महत्वाच्या सूचना दिल्या. 'महायुतीला गालबोट लागेल असं वक्तव्य करू नका. युतीचा फॉर्म्युला काय असावा त्याची तयारी करा. प्रत्येक जागेबाबत माहिती पटवता आली पाहिजे. ही निवडणूक महत्वाची आहे. मनपा निवडणूक कामांच्या जोरावर आपण जिंकू शकतो. पाया मजबूत तर पक्ष मजबूत. पुढची निवडणूक मिनी विधानसभा आहे. सगळ्यांनी एकनाथ शिंदे बनून काम करा.', असे आदेश एकनाथ शिंदे यांनी दिले.

तसंच, 'तुम्हाला ज्यांनी मंत्री आणि आमदार केलं त्यांना नेता बनवा. स्थानिक पदाधिकाऱ्यांशी बोलून सगळ्यांचा रिपोर्ट तयार करा. जिल्ह्याची जबाबदारी प्रत्येक मंत्र्यांवर आहे. मतदार याद्या अपडेट करा. त्यासाठी अॅप तयार केलंय. राज्यात त्यासाठी ट्रेनिंग होणार आहे. बोगस नावांवर लक्ष ठेवा.', अशा देखील सूचना एकनाथ शिंदे यांनी दिल्या.