Maharashtra Politics: दे धक्का! अजितदादांचं भाजपला जशास तसे उत्तर; 'किंगमेकर' नेत्याचा राष्ट्रवादीत प्रवेश

गोपाल मोटघरे, साम प्रतिनिधी

नेत्याची फोडाफाडी करणाऱ्या भाजपला पिंपरीत राष्ट्रवादीनं जशास तसे उत्तर दिलंय. दोन दिवसापूर्वी १५ माजी नगरसेवकांना भाजपमधून पळवून देणाऱ्या भाजपचा बदला राष्ट्रवादीनं घेतलाय. निवडणुकीचा निकाल आपल्या बाजूनं फिरवणाऱ्या नेत्याला भाजपमधून फोडत राष्ट्रवादीत प्रवेश घडवून आणलाय. संपूर्ण पॅनल विजयी करण्याची ताकद असलेले भाजपचे पिंपरी गावातील माजी नगरसेवक संदीप वाघेरे यांनी हाती घड्याळ बांधलंय.

पुणे शहरातील बारामती होस्टेल येथे स्वतः अजित पवार यांनी वाघेरे यांचे स्वागत केलं. वाघेरे यांच्या राष्ट्रवादी प्रवेशामुळे माजी उपमहापौर डब्बू आसवाणी आणि संदीप वाघेरे मिळून संपूर्ण पॅनल जिंकण्याची शक्यता वाढलीय. दरम्यान माजी महापौर संजोग वाघेरे यांच्यासह माजी उपमहापौर राजू मिसाळ, प्रभाकर वाघेरे, स्थायी समितीचे माजी अध्यक्ष प्रशांत शितोळे आणि ११ माजी नगरसेवकांनी मुंबई येथे प्रदेशाध्यक्ष रविंद्र चव्हाणे यांच्या उपस्थितीत भाजपमध्ये प्रवेश केला होता.

इतक्या नेत्यांचे भाजप प्रवेश होणं हे राष्ट्रवादीसाठी धक्का मानलं जात होतं. अजित पवार यांच्या राष्ट्रवादीनं या धक्क्याचा बदला आज घेतलाय. आज संदीप वाघेरे यांनी राष्ट्रवादीमध्ये प्रवेश केल्यानं भाजपमधील अनेक ताकदीचे उमेदवार राष्ट्रवादीच्या संपर्कात आलेत. दरम्यान मावळ लोकसभा निवडणुकीत संदीप वाघेरे यांनी ठाकरेंच्या शिवसेनेने उमेदवारी देऊ केली होती. संजोग वाघेरेयांच्या ऐवजी संदीप वाघेरे लोकसभा उमेदवार असते, विजय मिळाला असता.

कारण पिंपरीगाव परिसरात संदीप वाघेरे यांनी महापालिकेशिवाय स्वखर्चाने कोट्यवधी रुपयांची कामे केली आहेत, त्यामुळे त्यांच्यापाठी मोठा जनाधार आहे. वाघेरे यांच्या राष्ट्रवादीती प्रवेशाचा परिणाम परिसरातील दोन-तीन प्रभागांवर होण्याची शक्यता आहे. आज मनसेचे कैलास दांगट आणि त्यांची पत्नी माजी नगरसेविका अजित पवार यांच्या भेटीला आलेत. वारजे भागात अजित पवारांच्या सायली वांजळे यांनी भाजपात प्रवेश केल्यांनंतर अजित पवार यांच्याकडून दुसऱ्या पक्षातील पदाधिकारी घेण्यास सुरुवात झालीय. त्यामुळे या भेटीला महत्त्व प्राप्त झालंय.