पुण्याला मिळणार आणखी एक महामार्ग, राज्य सरकारने १२०० कोटींच्या प्रकल्पाला दिली मंजुरी, कुठून जाणार हायवे?

Neral Shirur highway latest update : मुंबई आणि पुणे या दोन शहरांमध्ये दिवसेंदिवस वाहनांची संख्या मोठ्या प्रमाणात वाढत आहे. त्यामुळेच एक्सप्रेसवेवर मोठ्या प्रमाणात वाहतूककोंडी होते. कधीकधी ट्रॅफिकमध्ये ४-४ तास जातात, पण आता सरकारकडून ही वाहतूककोंडी सोडवण्यासाठी आणखी एक पर्यायी मार्ग तयार केला जाणार आहे. अहिल्यानगर आणि नाशिक या महामार्गाला जोडणाऱ्या नेरळ-शिरूर या चारपदरी हायवेच्या कामाला राज्य सरकारकडून मान्यता देण्यात आली आहे.

नेरळ-शिरूर महामार्गामुळे नाशिक आणि अहिल्यानगरला झटक्यात जाता येणार आहे. त्याशिवाय मुंबई-पुणे एक्सप्रेसवेवर होणारी वाहतूककोंडीही कमी होणार आहे. या नव्या महामार्गामुळे मुंबईहून थेट अहिल्यानगरला जाण्यासाठी नवीन पर्याय मिळेल. नेरळ-शिरूर या नव्या चारपदरी महामार्गावर मुंबई-पुणे एक्सप्रेसवेवरील वाहतूकीकोंडी कमी होईल. कारण, मुंबईहून अहिल्यानगरला जाण्यासाठी अनेकजण मुंबई-पुणे या महामार्गाचा वापर करतात, त्यांच्यासाठी आता नवा महामार्ग तयार करण्यात येत आहे.

पायाभूत सुविधा समितीने मार्च २०२५ मध्ये नेरळ-शिरूर या नव्या महामार्गाला मंजुरी दिली होती. त्यानंतर सार्वजनिक बांधकाम विभागाकडून या रस्त्याच्या भूसंपदनासाठी १२०० कोटींच्या खर्चाला मंजुरी देण्यात आळी आहे. नेरळ-शिरूर हा महामार्ग खासगीकरणाच्या माध्यामतून तयार केला जाणार आहे. सरकारकडून आता लवकरच भूसंपादन सुरू केले जाईल. अमोल कोल्हेंसह पुण्यातील अनेक नेत्यांनी या महामार्गासाठी पाठपुरावा केला होता.

रायगड जिल्ह्यातील नेरळ येथून चारपदरी महामार्गाची सुरुवात होणार आहे. पुणे-अहिल्यानगर रस्त्यावर शिरूर येथे हा महामार्ग संपेल. या महामार्गासाठी सविस्तर प्रकल्प आराखडा (डीपीआर) तयार करण्याचे कामाला सुरूवात होईल. भीमाशंकर अभयारण्य आणि वन जमिनीचे मोठे क्षेत्र या महामार्गात असल्याने परवानग्यांची अवश्यकता लागणार आहे. खेड एसीझेड, तळेगाव, चाकण, रांजणगाव आणि सुपा औद्योगिक क्षेत्रांना याचा फायदा होईल.