Kalyan News : ऐन निवडणुकीत सापडलं ५ कोटींचं घबाड; कोट्यवधींची रोकड पाहून अधिकाऱ्यांना बसला धक्का

अभिजीत देशमुख, साम टीव्ही प्रतिनिधी

कल्याण : राज्यात विधानसभा निवडणुकीची धामधूम सुरु आहे. राज्यात सर्वच राजकीय पक्षांनी प्रचारसभांचा धडाका लावला आहे. विधानसभा मतदासंघातील उमेदवारांनी प्रचारासाठी कंबर कसली आहे. एकीकडे निवडणुकीची रणधुमाळी सुरु असताना निवडणूक आयोगाचे अधिकारी देखील ड्युटीवर आहेत. निवडणूक अधिकाऱ्यांकडून मतदारसंघातील घडामोडी आणि पैशांच्या देवाणघेवाणी चांगलंच लक्ष्य आहे. याचदरम्यान, आयकर विभागाने कल्याणमध्ये ५ कोटींची रोकड ताब्यात घेतली आहे.

कल्याण शीळ फाटा रोडवर कोट्यवधींची रोकड पकडण्यात आली आहे. या रोडवर पाच कोटींहून अधिक रक्कम असल्याची माहिती मिळाली आहे. एटीएममध्ये पैसे भरण्यासाठी आलेल्या वाहनात रोकड आढळली आहे. रोकडबाबत माहिती पुरावे देऊ न शकल्याने भरारी पथकाने रक्कम आयकर विभागाच्या ताब्यात दिली. ऐन विधानसभा निवडणुकीत कोट्यवधींची रोकड सापडल्याने मतदारसंघात एकच खळबळ उडाली आहे.

छत्रपती संभाजीनगरमध्ये मोठी कारवाई

छत्रपती संभाजीनगर विशेष पोलीस महानिरीक्षक कार्यालयाच्या परिक्षेत्रात पोलिसांना मोठे घबाड सापडले आहे. पंधरवड्यात छत्रपती संभाजीनगर,जालना, बीड आणि धाराशिव जिल्ह्यात ग्रामीण पोलिसांनी कारवाई केली आहे. राज्यातील २१ विधानसभा मतदारसंघात वेगवेगळ्या ठिकाणी पोलिसांची नाकाबंदी, चेकिंग दरम्यान मोठी कारवाई केली आहे.

पंधरवड्यात विधानसभा निवडणूक आदर्श आचारसंहितेच्या नाकाबंदी आणि वाहन तपासणीदरम्यान आतापर्यंत ५ कोटी रोख रक्कम आणि जवळपास १० कोटी रुपये किंमतीचे सोने-चांदी सापडले आहेत. अवैध दारू विक्री- वाहतूक करणाऱ्या विरोधात दीड हजार गुन्हे दाखल करून 2 लाख 65 हजार लिटर दारू जप्त करण्यात आली आहे. त्याशिवाय जवळपास दोन कोटी रुपयाचा मुद्देमाल गुन्हेगाराकडून जप्त करण्यात पोलिसांना यश आलं आहे.

गुटखा बंदी असतानाही गुटखा विक्री आणि वाहतूक करणाऱ्यांवर 84 गुन्हे दाखल करून जवळपास 13 हजार किलो गुटखा जप्त करण्यात आला आहे. त्यासोबत दोन कोटी किंमतीचा मुद्देमाल जप्त करण्यात आला आहे. अंमली पदार्थ आणि गांजा आणि नशेचे पदार्थ विक्री करणारे 42 गुन्हे दाखल करून 28 क्विंटल अमली पदार्थ जप्त करण्यात आली आहे. एकूण तीन कोटी रुपयांचा मुद्देमाल जप्त करण्यात आला आहे.