MVA CM Face: मविआत मुख्यमंत्रिपदावरून तिढा; सीएमपदाचा उमेदवार जाहीर करा, उद्धव ठाकरे यांची जाहीर मागणी

मविआचा मुख्यमंत्रिपदाचा चेहरा कोण ? यावरून मविआत तिढा दिवसेंदिवस वाढत चालल्याचं दिसतंय. आतापर्यंत दुस-या फळीतले नेते यावर भाष्य करून एकमेकांवर कुरघोडी करत होते. मात्र मविआच्या पहिल्या संयुक्त पदाधिकारी मेळाव्यात थेट उद्धव ठाकरेंनीच जाहीरपणे मुख्यमंत्रिपदाचा उमेदवार जाहीर करण्याची मागणी केलीय.

एवढंच नव्हे तर काँग्रेस आणि राष्ट्रवादीचा नेता मुख्यमंत्रिपदाचा चेहरा असला तरी आपण त्याला पाठिंबा देऊ मात्र उमेदवार जाहीर कराच, अशी ठाम भूमिका ठाकरेंनी घेतलीय. त्यामुळे काँग्रेस आणि राष्ट्रवादीची चांगलीच अडचण झालीय. तर नेतेच याबाबत काय तो निर्णय घेतील, असं सांगत काँग्रेसनं मेळाव्यात या मुद्यावर सावध भूमिका घेतलीय. या मेळाव्यात बोलताना उद्धव ठाकरे म्हणाले की, 'मुख्यमंत्रिपदाचा उमेदवार जाहीर कराच.'

सीएमपदाचा उमेदवार कोण?

ज्याच्या जास्त जागा जिंकून येतील त्याचा मुख्यमंत्री असं काँग्रेस-राष्ट्रवादीचे नेते वारंवार सांगत आहेत. मात्र हे धोरणच उद्धव ठाकरेंना मान्य नसल्याचं त्यांनी स्पष्ट केलं. कारण जास्त जागा निवडून आणण्याच्या नादात मित्र पक्ष एकमेकांचे उमेदवार पाडण्यासाठीच काम करतात, असा आरोप उद्धव ठाकरेंनी केला. एवढंच नव्हे तर त्यांनी हे सांगताना भाजप-शिवसेना युतीतला या पाडापाडीचा अनुभवही जाहीररित्या सांगितला.

ठाकरेंची मागणी मान्य होणार?

विधानसभा निवडणुकीत कार्यकर्त्यांमध्ये उत्साह निर्माण व्हावा यासाठी मविआनं आपल्या पदाधिकाऱ्यांचा संयुक्त मेळावा घेतला. मात्र मुख्यमंत्रिपदाच्या चेहरा जाहीर करण्याची ठाकरेंनी उघडपणे मागणी केल्यामुळे मविआ कार्यकर्त्यांमध्ये एकोपा निर्माण होण्याऐवजी वाद निर्माण होऊन डोकेदुखी तर वाढणार नाही ना, हेच मविआला टेंशन आहे.