Pune Koyta Gang : पुण्यात पुन्हा कोयता गँगचा धुमाकूळ, हडपसर परिसरात दुकानांची तोडफोड; व्यापाऱ्यांना धमकावलं

पुणे शहरात दिवसेंदिवस गुन्हेगारीच्या घटना वाढतच चालल्या आहेत. गुन्हेगारांना कायद्याचा धाक राहिला का नाही? असा प्रश्न नागरिक उपस्थित करीत आहेत. एकीकडे हिट अँड रनची घटना ताजी असतानाच दुसरीकडे शहरात पुन्हा कोयता गँगने धुमाकूळ घालण्यास सुरुवात केली आहे. हडपसर परिसरात शनिवारी (ता. ३१) कोयता गँगच्या गुंडांनी दुकानांची तोडफोड केली आहे.

हातात कोयते घेऊन कोयता गँगच्या गुंडांनी फुरसुंगी भेकराईनगर येथील दुकानांची तोडफोड केली. यावेळी त्यांनी खंडणीसाठी व्यापाऱ्यांना देखील धमकावलं. इतकंच नाही, तर रस्त्यावरून येणाऱ्या जाणाऱ्या वाहनांवर दगडफेक देखील केली. या धक्कादायक घटनेचा व्हिडीओ समोर आला आहे.

या घटनेनं नागरिकांमध्ये पुन्हा भीतीचं वातावरण पसरलं आहे. धक्कादायक बाब म्हणजे, जेव्हा कोयता गँगचे गुंड धिंगाणा घालत दुकानांची तोडफोड करत होते, तेव्हा आम्ही कायद्याला अजिबात घाबरत नाहीत, असं ओरडून सांगत होते. या प्रकारामुळे फुरसुंगीतील रहिवासी सुद्धा हैराण झाले आहेत.

मिळालेल्या माहितीनुसार, फुरसुंगीतील भेकराईनगर परिसरात शनिवारी सायंकाळी ६ वाजेच्या सुमारास कोयता गँगचे गुंड आले. त्यांनी परिसरात धिंगाणा घालत व्यापाऱ्यांना खंडणीसाठी धमकावलं. स्थानिकांच्या माहितीनुसार, गुंडांच्या या टोळक्यामध्ये अभय गायकवाड उर्फ भुऱ्या उर्फ छोटा रावण तसेच त्याचे साथीदार अरविंद उर्फ नक्या अजय माने, गौरव मंडल, विजय बसवराज कुरले, माणिक नागेश सगर उर्फ वाढीव बबल्या यांचा समावेश होते.

Edited by - Satish Daud

कुठलीही भीती न बाळगता हे गुंड हातातील हत्यारे हवेत भिरकावत रस्त्यावरून येणाऱ्या जाणाऱ्यांना धमकावत होते. व्यापाऱ्यांनी खंडणी दिली नाही म्हणून त्यांनी काही दुकानांची तोडफोड देखील केली. आरोपींनी तेथून जाताना रस्त्यावर असणाऱ्या गाड्यांची तोडफोड केली. तसेच पापडे वस्ती येथील श्री तुकाराम नगरी अपार्टमेंट येथेही सोसायटीत पार्क केलेल्या ७ ते ८ गाड्यांच्या दगड मारून काचा फोडल्या.

दरम्यान, यातील काही गुंड हे अल्पवयीन असल्याने त्यांच्यावर कारवाई करणे अडचणीचे होते, असे पोलिसांकडून वारंवार बोलले जाते. मात्र, याच गोष्टीचा फायदा घेऊन हे गुंड परिसरातील नागरिकांच्या मनात दहशत पसरवण्याचा प्रयत्न करीत आहेत. त्यामुळे आतातरी पोलिसांना जाग येणार का? असा प्रश्न नागरिक उपस्थित करीत आहेत.