Kasba Chinchwad Bypoll Results : संपूर्ण महाराष्ट्राचं लक्ष लागून असलेल्या पुण्यातील कसबा आणि चिंचवड पोटनिवडणुकीसाठीची आज मतमोजणी पार पडणार आहे. सकाळी ८ वाजेपासून या मतमोजणीला सुरूवात होणार आहे. या निवडणुकीत दिग्गजांची प्रतिष्ठा पणाला लागली आहे. दोन्ही जागांवर आपलाच उमेदवार विजयी व्हावा यासाठी भाजपच्या केंद्रीय मंत्र्यांपासून ते राज्याच्या मुख्यमंत्र्यांपर्यंत अगदी सर्वांनीच मोठा प्रचार केला होता. (Latest Marathi News)
दुसरीकडे सत्ताधारी भाजपला (BJP) धक्का देण्यासाठी महाविकास आघाडीचे अनेक दिग्गज नेत्यांनी सुद्धा प्रचारात सहभाग घेतला होता. त्यामुळे या दोन्ही जागेवरील निवडणूका चांगल्याच गाजल्या होत्या. दरम्यान, आज या निवडणूकीचा निकाल जाहीर होणार असून मतपेट्यांमधून कोण बाजी मारणार याकडे राज्याचे लक्ष लागले आहे.
कसबा निवडणूकीत कोण मारणार बाजी?
कसबा मतदारसंघात भाजपच्या हेमंत रासने विरुद्ध कॉंग्रेसचे रविंद्र धंगेकर अशी थेट लढत आहे. कसब्यात या दोघांमध्ये सध्या चांगलीच चुरशीची लढत दिसत आहे. दोन्ही पक्षाकडून धुमधडाक्यात प्रचार झाला. दरम्यान, निकालाआधीच स्ट्रेलिमा या संस्थेने कसब्याचा एक्झिट पोल जाहीर केला आहे.
त्यात भाजपला धक्का बसेल असं सांगण्यात आलं आहे. कसब्यात भाजपचे उमेदवार हेमंत रासने यांचा पराभव होणार असून काँग्रेसचे रविंद्र धंगेकर हे मोठ्या मताधिक्यांनी विजयी होतील असं सांगितलं आहे. (Maharashtra Political News)
चिंचवडमध्ये कोण उधळणार गुलाल?
चिंचवड पोटनिवडणूकही मोठी अटीतटीची होण्याची शक्यता आहे. एकीकडे कसब्याची जागा महाविकासआघाडी जिंकणार असा अंदाज बांधला जात असताना, दुसरीकडे चिंचवडच्या जागेवर भाजपच्या उमेदवार आश्विनी जगताप यांचा मोठ्या मताधिक्यांनी विजय होईल, असा अंदाज एक्झिट पोलमध्ये वर्तवण्यात आला आहे. एक्झिट पोलनुसार, चिंचवडमध्ये राष्ट्रवादीचे उमेदवार नाना काटे यांना 93,003 मतं तर अपक्ष उमेदवार 60,173 मतं मिळणार असल्याचा अंदाज व्यक्त करण्यात येत आहे.
पोलिसांचा मोठा बंदोबस्त
दरम्यान, निकालामुळे कोणताही अनुचित प्रकार होवू नये यासाठी कोरेगाव पार्क भागातील अन्न धान्य महामंडळाचे गोदाम तसेच शहरातील मध्यभागात पोलिसांकडून कडक बंदोबस्त तैनात करण्यात येणार आहे. तसेच निकालानंतर विजयी मिरवणूक काढण्यास पोलिसांनी मनाई केली आहे.
अन्न धान्य महामंडळाचे गोदाम आणि मध्यभागातील कसबा पेठ, सोमवार पेठ, मंगळवार पेठ, रास्ता पेठ, नाना पेठ, रविवार पेठ, बुधवार पेठ, शुक्रवार पेठ, घोरपडे पेठ, लोहियानगर, कासेवाडी भागात बंदोबस्त ठेवण्यात येणार आहे. यासह संवेदनशील ठिकाणी पोलिसांनी बंदोबस्तात वाढ केली आहे. विशेष शाखा तसेच गुन्हे शाखेतील पोलिसांची पथके मध्यभागात गुरुवारी गस्त घालणार आहेत.
Edited By - Satish Daud
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.