Kalyan : कल्याणमध्ये कायदा सुव्यवस्था धाब्यावर; नशखोरांची घरात घुसून दुकानदार दाम्पत्याला मारहाण

संघर्ष गांगुर्डे, कल्याण

कल्याणच्या आडिवली ढोकळी परिसर पुन्हा एकदा नशेखोरांच्या त्रासामुळे दहशतीत आला आहे. गणेश चौक परिसरात एका दुकानदार आणि त्याच्या पत्नीला मारहाण करत काही नशेखोरांनी गाड्यांची तोडफोड केल्याची धक्कादायक घटना रविवारी उशिरा घडली. संपूर्ण प्रकार सीसीटीव्ही कॅमेऱ्यात स्पष्टपणे कैद झाला असून नागरिकांनी पोलिस प्रशासनाकडे तात्काळ कारवाईची मागणी केली आहे.

स्थानिकांकडून मिळालेल्या माहितीनुसार, काही नशेत असलेल्या तरुणांनी परिसरात बेहिशेबी वर्तन करत प्रथम रस्त्यावर उभ्या वाहनांची तोडफोड केली. त्यानंतर गणेश चौकातील किराणा दुकानाजवळ गोंधळ घालत दुकानदार आणि त्यांच्या पत्नीला मारहाण केली. अचानक घडलेल्या या हल्ल्यामुळे परिसरात भीतीचे वातावरण निर्माण झाले आहे.

घटनेनंतर नागरिक मोठ्या प्रमाणावर एकत्र आले असून, रोजच्या वाढत्या नशेखोरीच्या घटनांवर आळा घालण्यासाठी पोलिसांचे बीट लवकरात लवकर वाढवण्याची मागणी त्यांनी केली आहे. रात्रीच्या वेळी पोलिस गस्त पुरेशी नसल्याचा नागरिकांचा आरोप आहे. यावर महिला नागरिकानी सांगितले की, इथे दररोज नशेखोरांचा त्रास वाढला आहे.

मुलांना, महिलांना सुरक्षितता राहिलेली नाही. कालची घटना तर भयंकर होती. दुकानदारांच्या घरात घुसून मारहाण केली. आम्ही पोलिसांना वारंवार सांगत आहोत, पण गस्त वाढवली नाही तर मोठी दुर्घटना घडू शकते. दरम्यान, सीसीटीव्हीत कैद झालेल्या फुटेजच्या आधारे पोलिस पुढील तपास करत असल्याची माहिती मिळाली आहे. नागरिकांमध्ये मात्र भीतीचे सावट कायम असून तातडीने कठोर कारवाईची अपेक्षा व्यक्त केली जात आहे.