KDMC चा मोठा निर्णय! नोटरी घरांवरील कर नाव हस्तांतरणास हिरवा कंदील

संघर्ष गांगुर्डे, साम टीव्ही

कल्याण डोंबिवली महानगरपालिकेच्या महासभेमध्ये भाजप नगरसेवक दीपेश म्हात्रे यांनी नागरिकांच्या दृष्टीने अत्यंत महत्त्वाचा जनहिताचा विषय उपस्थित करत नोटरी पद्धतीने खरेदी-विक्री झालेल्या घरांच्या मालमत्ता कर नाव हस्तांतरणाचा मुद्दा मांडला. त्यांच्या पाठपुराव्याला यश मिळत महासभेने या प्रस्तावाला मंजुरी दिली आहे. शहरातील अनेक चाळी आणि जुन्या वस्त्यांमधील घरे नोटरी पद्धतीने खरेदी-विक्री करण्यात आली आहेत. मात्र अशा घरांच्या मालमत्ता कराच्या नोंदी जुन्या मालकांच्या नावावरच राहिल्याने नवीन मालकांना विविध शासकीय कामांसाठी मोठ्या अडचणींना सामोरे जावे लागत होते. प्रत्यक्ष घराचा मालक वेगळा असला तरी करपावती जुन्या मालकाच्या नावावर असल्याने अनेक नागरिक वर्षानुवर्षे त्रस्त होते.

याबाबत महासभेत विषय मांडताना नगरसेवक दीपेश म्हात्रे यांनी जुन्या करदात्याच्या नावावरून नवीन करदात्याच्या नावावर मालमत्ता कर हस्तांतरण करण्यास परवानगी देण्याची मागणी केली. यामुळे नागरिकांच्या समस्या दूर होतील तसेच महापालिकेच्या कर विभागालाही प्रत्यक्ष मालकांची माहिती उपलब्ध होऊन थकबाकी वसुली अधिक प्रभावीपणे करता येईल, असे त्यांनी स्पष्ट केले.

या निर्णयामुळे महापालिकेचे आर्थिक नुकसान टाळण्यास मदत होणार असून कर प्रशासन अधिक पारदर्शक आणि कार्यक्षम होईल. महासभेने या कामास मंजुरी दिल्याने लाखो सामान्य नागरिकांना मोठा दिलासा मिळणार असल्याची भावना व्यक्त केली जात आहे. याबाबत प्रतिक्रिया देताना नगरसेवक दीपेश म्हात्रे यांनी सांगितले की, हा निर्णय सर्वसामान्य नागरिकांच्या हिताचा असून अनेक वर्षांपासून प्रलंबित असलेल्या समस्येवर तोडगा निघाला आहे. यामुळे नागरिकांना त्यांच्या मालमत्तेची नोंद अधिकृतपणे स्वतःच्या नावावर करता येणार असून महापालिकेच्या महसूल व्यवस्थेलाही त्याचा फायदा होणार आहे.