आंबिवलीत पूजेदरम्यान दोन कुटुंबीयांमध्ये वाद; महिलांची एकमेकांना धक्काबुक्की, सोशल मीडियावर व्हिडिओ व्हायरल

संघर्ष गांगुर्डे, साम प्रतिनिधी

कल्याणजवळील आंबिवली परिसरात पूजेच्या कार्यक्रमादरम्यान दोन कुटुंबीयांमध्ये वाद झाल्याची घटना समोर आली आहे. या प्रकरणी दोन्ही पक्षांनी कल्याणच्या खडकपाडा पोलीस ठाण्यात एकमेकांविरोधात तक्रारी दाखल केल्या असून, पोलिसांनी पुढील तपास सुरू केला आहे. मात्र वाद आणि नंतर राडा झाल्याचा व्हिडिओ सोशल मीडियावर चांगलाच वायरल झालाय.

मिळालेल्या माहितीनुसार,आंबिवली येथील गणेश पाटील नगर परिसरात आशा शर्मा यांच्या वतीने शिवलिंग स्थापना आणि भंडाऱ्याचे आयोजन करण्यात आले होते. यावेळी त्याच इमारतीत राहणाऱ्या कुटुंबीयांसोबत वाद झाल्याचे सांगितले जात आहे. आशा शर्मा यांनी केलेल्या आरोपानुसार, पूजेदरम्यान झालेल्या वादानंतर त्यांना मारहाण करण्यात आली.

तसेच वाद मिटविण्यासाठी आलेल्या काही शेजारी महिलांनाही मारहाण झाल्याचा त्यांचा आरोप आहे. त्यांनी असा दावा केला की, ज्या ठिकाणी शिवलिंग स्थापना आणि पूजेचा कार्यक्रम सुरू होता, त्या जागेशी यांचा कोणताही संबंध नव्हता, तरीही वाद निर्माण करण्यात आला. दुसरीकडे, या प्रकरणात त्या कुटुंबियांची भूमिका किंवा प्रतिक्रिया अद्याप समोर आलेली नाही. खडकपाडा पोलिसांनी सांगितले की, हा दोन कुटुंबीयांतील वाद असून दोन्ही बाजूंनी एकमेकांविरोधात तक्रारी दिल्या आहेत.

दोन्ही पक्षांचे आरोप नोंदविण्यात आले असून, प्रकरणाचा पुढील तपास सुरू आहे. कल्याण-डोंबिवली महानगरपालिकेच्या काँग्रेस गटनेत्या कांचन कुलकर्णी यांनी या घटनेवर प्रतिक्रिया देताना, धार्मिक विषयावर मी भाष्य करणार नाही. मात्र, महिलांना मारहाण झाली असेल तर संबंधितांवर कठोर कारवाई झाली पाहिजे,अशी मागणी केली आहे. या प्रकरणात पोलिसांचा पुढील तपास आणि त्यानंतर होणारी कारवाई महत्त्वाची ठरणार आहे.