Accident News : कल्याणमध्ये भीषण अपघात; KDMCच्या घंटा गाडीने चिरडून २ वर्षांच्या मुलाचा मृत्यू

संघर्ष गांगुर्डे, कल्याण

कल्याण ग्रामीणमधील वसार गावात घडलेल्या एका अत्यंत हृदयद्रावक अपघाताने संपूर्ण परिसर सुन्न झाला आहे. घराबाहेर खेळत असलेल्या दोन वर्षीय मुलाला केडीएमसीच्या घंटा गाडीने चिरडल्याची घटना घडली आहे. या दुर्घटनेत मुलाचा जागीच मृत्यू झाला. मृत मुलाचे नाव शिवम राठोड असे आहे. या घटनेने केवळ राठोड कुटुंबावर दुःखाचा डोंगर कोसळला आहे.

मिळालेल्या माहितीनुसार, शिवम आपल्या घरासमोर खेळत होता. त्या वेळी कचरा उचलण्यासाठी आलेल्या गाडीच्या चालकाने निष्काळजीपणे गाडी चालवत शिवमला चिरडले. हा अपघात इतका भीषण होता की, शिवमचा जागीच मृत्यू झाला. शिवमचे आई वडील मोलमजुरी करून संसार चालवतात. काही क्षणांपूर्वी हसणारा, खेळणारा चिमुकला अचानक निघून गेल्याने कुटुंबीयांवर दुःखाचा डोंगर कोसळला आहे.

केडीएमसीकडील कचरा उचलण्याचे काम एका खाजगी कंपनीकडे देण्यात आले आहे. मात्र या गाड्यांच्या चालकांकडून निष्काळजीपणे वाहन चालवले जात असल्याचा आरोप स्थानिक नागरिकांनी केला आहे. या घटनेनंतर नागरिकांनी घटनास्थळी मोठी गर्दी करत संताप व्यक्त केला. यापूर्वीही अशा कचरा गाड्यांमुळे अनेक अपघात झाल्याचा आरोप नागरिकांनी केला असून संबंधित चालकांवर कठोर कारवाई करण्याची मागणी करण्यात येत आहे.

घटनेची माहिती मिळताच हिललाईन पोलीस ठाण्याचे अधिकारी घटनास्थळी दाखल झाले. पोलिसांनी पंचनामा करून अपघाताचा तपास सुरू केला आहे. शिवमचा मृतदेह शवविच्छेदनासाठी कल्याण येथील रुक्मिणीबाई रुग्णालयात पाठविण्यात आला आहे. आपल्या चिमुकल्याला गमावलेल्या आईने आक्रोश करत न्यायाची मागणी केली आहे. माझ्या मुलाला न्याय मिळाला पाहिजे, दोषींवर कठोर कारवाई झाली पाहिजे,अशी मागणी कुटुंबीयांकडून करण्यात येत आहे. या घटनेनंतर केडीएमसीच्या कंत्राटी कचरा वाहतूक व्यवस्थेवर पुन्हा एकदा प्रश्नचिन्ह उपस्थित झाले आहे.