Shocking : शिक्षकाने विद्यार्थिनीला झाडू मारण्याच्या बहाण्याने बोलावलं; अश्लील व्हिडिओ दाखवून केला लैंगिक अत्याचार, जळगावात खळबळ

संजय महाजन, जळगाव

जळगाव जिल्ह्यातील धरणगाव तालुक्यातून एक अत्यंत धक्कादायक आणि संतापजनक घटना समोर आली आहे. जिल्हा परिषद शाळेत कार्यरत असलेल्या शिक्षकानेच इयत्ता चौथीत शिकणाऱ्या अल्पवयीन विद्यार्थिनीचे लैंगिक शोषण केल्याचा गंभीर प्रकार उघडकीस आला आहे. या घटनेमुळे संपूर्ण परिसरात खळबळ उडाली असून पालक आणि नागरिकांमध्ये तीव्र संताप व्यक्त केला जात आहे.या प्रकरणी आरोपी शिक्षक नंदलाल नारायण मराठे याच्याविरुद्ध धरणगाव पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, पीडित मुलगी आपल्या कुटुंबासह धरणगाव तालुक्यातील एका गावात राहते आणि स्थानिक जिल्हा परिषद शाळेत इयत्ता चौथीत शिक्षण घेत आहे. तक्रारीनुसार, आरोपी शिक्षक मराठे हा विद्यार्थिनीला शाळा सुरू होण्यापूर्वी सकाळी सुमारे दहा वाजता झाडू मारण्याच्या कारणावरून शाळेत बोलावून घेत असे.

शाळेत कोणीही नसल्याचा फायदा घेत तो तिच्यासोबत गैरवर्तन करत असल्याचे समोर आले आहे. धक्कादायक बाब म्हणजे, आरोपी मुलीला मोबाइलवर अश्लील व्हिडिओ दाखवून तिचे शोषण करत असल्याची माहितीही पुढे आली आहे. ३० एप्रिल २०२६ रोजी शाळेच्या शेवटच्या दिवशी देखील आरोपीने मुलीवर अत्याचार केल्याचे तक्रारीत नमूद करण्यात आले आहे.

विद्यार्थिनीने घडलेली बाब आपल्या आईला सांगितल्यानंतर हा गंभीर प्रकार उघडकीस आला. मुलीच्या आईने दिलेल्या फिर्यादीवरून धरणगाव पोलिसांनी तात्काळ गुन्हा दाखल करत तपास सुरू केला आहे. आरोपी शिक्षकाविरुद्ध पोक्सो कायद्यांतर्गत कठोर कारवाई करण्यात येईल, असे पोलिसांनी स्पष्ट केले आहे. या घटनेमुळे शाळांमधील विद्यार्थ्यांच्या सुरक्षेबाबत गंभीर प्रश्न उपस्थित झाले आहेत.