Railway News : ‘रेलवन’ अ‍ॅपमध्ये तांत्रिक त्रुटी, प्रवासी टीसीला पाहून चालू ट्रेनमध्ये काढतायत तिकीट; काय आहे नेमकं प्रकरण?

मयूर राणे, मुंबई

AI तंत्रज्ञाचा वापर करून प्रवाशांनी बऱ्याचवेळा बनावट तिकीट तयार केल्याचा प्रकार उघड झाल्यानंतर, या गैरप्रकाराला आळा घालण्यासाठी भारतीय रेल्वेने 'रेलवन' नावाचे अत्याधुनिक अ‍ॅप लाँच केले. मात्र आता या 'रेलवन' तिकीट बुकिंग अ‍ॅपमध्ये तांत्रिक त्रुटी आढळून आल्या आहेत. रेलवनमध्ये जिओ-फेन्सिंग प्रणाली असूनही प्रवासी चालू ट्रेनमध्ये असतानाच तिकीट बुक करू शकत असल्याचे समोर आले आहे.

रेल्वे बोर्डाने 'यूटीएस' अ‍ॅपमधील क्यूआर कोडवर आधारित तिकीट प्रणालीचा मोठ्या प्रमाणावर गैरवापर झाल्याने ती बंद केली होती. आता त्याच्या पर्यायात आलेल्या रेलवन अ‍ॅपमध्येही अशाच प्रकारची उणीव समोर आली आहे. कल्याणकडे जाणाऱ्या एसी लोकलमध्ये नियमित तिकीट तपासणीदरम्यान एका प्रवाशाने प्रवास सुरू असताना तिकीट काढल्याचे टीसीच्या निदर्शनास आले.

त्यावेळी तिकीट काढल्याची वेळ तपासल्यावर ते नुकतेच काढल्याचे त्यांच्या लक्षात आले. त्यामुळे याबाबत टीसीने वाणिज्य विभागाला कळवले. याबाबत मध्य रेल्वेने 'क्रिस'ला (सेंटर फॉर रेल्वे इन्फॉर्मेशन सिस्टीम्स) पत्र दिले असून या त्रुटी दूर करण्याचे सूचित केले आहे. अधिकाऱ्यांच्या माहितीनुसार, जुने 'यूटीएस' अ‍ॅप १ मार्चपासून बंद करून रेलवन अ‍ॅप सुरू केल्यावर अशा अनेक घटना समोर आल्या. मात्र पहिली अधिकृत नोंद ६ मार्च रोजी झाली.