सचिन कदम, रायगड|ता. ५ सप्टेंबर
Mumbai Goa Highway Traffic: गणरायाचा आगमन सोहळा अवघ्या दोन दिवसांवर आला आहे. गणपती बाप्पाच्या स्वागताची सर्वत्र जय्यत तयारी चालू असून मुंबई, पुण्यामध्ये राहणाऱ्या चाकरमान्यांचीही गावी जाण्याची गडबड सुरू आहे. नोकरी, तसेच व्यवसायानिमित्त मुंबईत राहणाऱ्या कोकणातील चाकरमानी गावाकडे निघाल्याने बसस्थानके, रेल्वेस्टेशन गर्दीने फुलून गेले असून आज सकाळपासून मुंबई- कोकण महामार्गावर मोठी वाहतूक कोंडी पाहायला मिळत आहे. या वाहतूक कोंडीमुळे प्रवाश्यांचेही हाल होत असून ट्रॅफिक सुरळित करताना पोलिसांनाही मोठी कसरत करावी लागत आहे.
गणपती उत्सव आला की मुंबईतील चाकरमान्यांना कोकणात जाण्याचे वेध लागतात. कोकणात गणेशोत्सव मोठ्या जल्लोषात साजरा केला जातो. आता बाप्पाचे आगमन दोन दिवसांवर आल्याने मुंबईतील चाकरमानी आज गावाकडे जाण्यासाठी घराबाहेर पडले आहेत. चाकरमान्यांच्या गर्दीने बसस्थानके, रेल्वेस्टेशनसह मुंबई- गोवा महामार्गही भरुन गेला आहे तर अनेक ठिकाणी मोठ्या प्रमाणावर वाहतूक कोंडी पाहायला मिळत आहे.
आज सकाळपासून कोकण रेल्वेला मोठी गर्दी पाहायला मिळत आहे. गणेशोत्सवासाठी कोकण रेल्वे मार्गावर मुंबई, सुरत, अहमदाबाद, वांद्रे , पनवेल वरुन 310 विशेष गाड्या सुटणार आहेत. गावी जाण्यासाठी प्रवाशांनी मोठी गर्दी केली असून प्रवाशांच्या सुरक्षेसाठी जवळपास 150 रेल्वे सुरक्षा बल कर्मचारी अधिकारी तैनात करण्यात आले आहेत, तसेच प्रवाशांच्या सोयीसाठी यात्री सहाय्यक तैनात करण्यात येणार आहेत.
चाकरमान्यांनी गर्दी केल्यामुळे मुंबई गोवा महामार्गावरील माणगावमध्ये मोठी वाहतूक कोंडी पाहायला मिळत आहे. माणगाव, तळेगाव, लोणेरे दरम्यान गणेशभक्त वाहतूक कोंडीत अडकले असून रस्त्यावर वाहनांची संख्या वाढल्याने मोठा खोळंबा झाला आहे. माणगाव बाजार पेठ, तळेगाव येथील उड्डाण पुल आणि लोणेरे विद्यापिठ जोडरस्ता परिसरात वाहनांच्या लांबच लांब रांगा लागल्या आहेत.
तसेच मुंबई गोवा महामार्गावरील लोणेरे येथेही मोठी वाहतूक कोंडी झाली आहे. महामार्गावर सुरू असलेल्या कामामुळे ही वाहतूक कोंडी झाली असून दोन्ही लेन वरती वाहने आल्याने रस्ते ठप्प झाले आहेत. ही वाहतूक कोंडी सोडवण्याचा प्रयत्न पोलीस करत आहेत. दरम्यान, कोकणात जाणाऱ्या चाकरमान्यांसाठी मुंबई भाजपनेही विशेष बसेस गाड्यांची सोय केली आहे. बीकेसी मैदानावरुन आज दुपारी १ वाजता मुंबई भाजपा अध्यक्ष आमदार अँड आशिष शेलार यांच्या हस्ते झेंडा दाखवून या गाड्या रवाना करण्यात येणार आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.