Ganeshotsav: पुण्यात आता ‘नो लिमिट’, विसर्जन मिरवणुकीत होणार ढोल-ताशांचा जल्लोष, पथकांवरची सक्ती हटली

अक्षय बडवे, साम प्रतिनिधी

पुण्यातील गणेश विसर्जन मिरवणुकीच्या पार्श्वभूमीवर ढोल-ताशा पथकांबाबतचा मोठा पेच अखेर मिटला आहे. पुणे पोलिसांनी याबाबत महत्त्वाचा निर्णय घेतला आहे. विसर्जन मिरवणुकीत सहभागी होणाऱ्या ढोल-ताशा पथकांच्या संख्येवर कोणतीही सक्ती राहणार नाही, असे स्पष्ट केले आहे. गणेश मंडळांना दरवर्षी ढोल पथकांसाठी परवानगी मिळवताना पथकांची संख्या आणि त्यामधील सदस्यांची संख्या यावर निर्बंध लावले जात होते. यामुळे अनेक मंडळांसमोर अडचणी निर्माण होत होत्या.

मात्र यावर्षी अनंत चतुर्दशी विसर्जन मिरवणुकीच्या पार्श्वभूमीवर पुणे पोलिसांनी या निर्बंधातून सवलत देण्याचा निर्णय घेतला आहे. गेल्या काही दिवसांपासून पुण्यात विसर्जन मिरवणुकीदरम्यान गणेश मंडळांनी किती ढोल ताशा पथक लावायचे याबाबत प्रश्न उपस्थित केला जात होता. ढोल ताशा पथकांवर मर्यादा यावी, अशी मागणी विविध स्तरातून केली जात होती.

मानाचे गणपती तसेच शहरातील इतर प्रमुख गणेश मंडळाच्या विसर्जन मिरवणुकीमध्ये ढोल ताशा पथकांच्या संख्येवर तसेच वादकांच्या सदस्य संख्येवर निर्बंध यावेत अशी सुद्धा मागणी अनेकांनी केली होती. याविषयी ढोल ताशा महासंघ तसेच शहरातील प्रमुख ढोल ताशा पथकांची आणि पुणे पोलिसांची अनेक वेळा बैठक सुद्धा झाली. काल झालेल्या बैठकीनंतर ढोल ताशा महासंघाकडून आणि इतर ढोल ताशा पथकाकडून विसर्जन मिरवणुकीत ढोल ताशा पथकांच्या संख्येवर आणि सदस्य संख्येवर मर्यादा आणल्यामुळे नाराजी व्यक्त करण्यात आली होती.

आज पुन्हा एकदा पुणे पोलिसांनी पुण्यातील ढोल ताशा पथकांसह महासंघ प्रतिनिधी सोबत चर्चा केली. यानंतर हा निर्णय मागे घेण्यात आला. त्यामुळे येथे शनिवारी होणाऱ्या विसर्जन मिरवणुकीत गणेश मंडळांच्या समोर तसेच ढोल ताशा पथकांसमोर असलेला तिढा अखेर सुटला आहे. गणपती विसर्जनादरम्यान ढोल ताशा पथकाची संख्या आणि त्यामध्ये सदस्यांचे संख्या बद्दल काही मुद्दा उपस्थित करण्यात आला आहे.

या विषयावर सर्वांगीण विचार करून असा निर्णय घेण्यात आला आहे की जो पर्यंत गणपती मंडळ ठरलेले वेळेचे पालन करतील तोपर्यंत पुणे पोलीस यांचे कडून पथकांचे संख्या आणि पथकामधील सदस्यांची संख्या यावर सक्ती केली जाणार नाही, अशी माहिती सह आयुक्त रंजन कुमार शर्मा यांनी दिली आहे.