डोंबिवली एमआयडीसीत गॅस पाइपलाईन फुटली; परिसरात भीतीचे वातावरण

संघर्ष गांगुर्डे, साम टीव्ही

डोंबिवली: येथील एमआयडीसी परिसरातील मिलापनगर येथे आज गुरुवारी दुपारी मोठी घटना घडली. प्लॉट क्रमांक RL-25 जवळ एमआयडीसीकडून सुरू असलेल्या गटाराच्या कामादरम्यान जेसीबीचा धक्का लागून महानगर गॅसची पाइपलाईन दुपारच्या सुमारास फुटली. या घटनेमुळे परिसरात काही काळ भीतीचे वातावरण निर्माण झाले. घटनेची माहिती मिळताच महानगर गॅस कंपनीचे कर्मचारी तातडीने घटनास्थळी दाखल झाले आणि सर्वप्रथम सुरक्षेच्या दृष्टीने गॅस पुरवठा बंद करण्यात आला. तसेच एमआयडीसीचे अधिकारीही घटनास्थळी पोहोचून परिस्थितीचा आढावा घेतला.

एमआयडीसी ठेकेदाराकडून काम करताना अशा प्रकारच्या निष्काळजीपणाच्या घटना यापूर्वीही घडल्याचे समोर आले आहे. 31 जानेवारी रोजी गटाराचे काम सुरू असताना एका मोठ्या झाडाच्या मुळांना धक्का लागल्याने ते झाड महावितरणच्या ट्रान्सफॉर्मर आणि उच्च दाबाच्या वीजवाहिन्यांवर कोसळले होते. त्या घटनेत मोठे आर्थिक नुकसान झाले होते आणि तब्बल सहा तास वीजपुरवठा खंडित झाला होता.

सद्यस्थितीत महानगर गॅसकडून फुटलेल्या पाइपलाईनची दुरुस्ती सुरू करण्यात आली असून परिसरातील गॅस पुरवठा पूर्णपणे बंद ठेवण्यात आला आहे. मात्र, दुरुस्तीचे काम कधी पूर्ण होणार आणि गॅस पुरवठा केव्हा पूर्ववत होणार याबाबत अद्याप कोणतीही अधिकृत माहिती मिळालेली नाही. गॅस पुरवठा बंद झाल्यामुळे मिलापनगर आणि आसपासच्या परिसरातील रहिवाशांना मोठ्या गैरसोयीचा सामना करावा लागत आहे.