रेल्वे स्टेशनबाहेरच रक्तरंजित थरार, चाकू आणि लोखंडी रॉडने ४० वार, तरूणाचा जागीच मृत्यू

संघर्ष गांगुर्डे, साम टीव्ही

डोंबिवली पोलीस ठाण्याच्या कार्यक्षेत्रात १३ डिसेंबर रोजी रात्री साडेअकराच्या सुमारास आर. के. एस्टेट, कोपर रेल्वे स्टेशनजवळ भीषण हत्या झाल्याची घटना घडली. जुन्या वादाच्या रागातून आरोपींनी नरेंद्र उर्फ काल्या भालचंद्र जाधव (वय ३७) यांच्यावर कोयता, चाकू व लोखंडी रॉडने तब्बल ४० वार करत निर्घृण खून केला.

प्राथमिक माहितीनुसार, आरोपींनी संगनमत करून नरेंद्र जाधव यांना तु यहाँ क्यों आया, अब यहाँ से जाने नहीं देंगे, तुझे यही खत्म कर देंगे अशी धमकी देत शिवीगाळ केली. त्यानंतर डोके, मान, गळा, छाती, पोट, पाठ तसेच हात-पायांवर प्राणघातक वार करण्यात आले. या हल्ल्यात नरेंद्र जाधव यांचा जागीच मृत्यू झाला.

दरम्यान, हल्ला थांबविण्यासाठी फिर्यादी नरेंद्र याचा मित्र शुभम राजेश पांडे वय २७ मध्ये पडले असता आरोपी आकाश बिराजदार याने तू बीच में आया तो तुझे खत्म कर देंगे अशी धमकी देत त्यांच्या डोक्यावर चाकूने वार केला. इतर आरोपींनीही हाताबुक्क्यांनी मारहाण केल्याने शुभम पांडे गंभीर जखमी झाले आहेत.

या प्रकरणी डोंबिवली पोलीस ठाण्यात विविध कलमानुसार गुन्हा दाखल करण्यात आला होता. घटनेनंतर पोलीस उपायुक्त परिमंडळ ३, कल्याण व सहायक पोलीस आयुक्त डोंबिवली विभाग यांच्या सूचनेनुसार तात्काळ विशेष तपास पथके तयार करण्यात आली. घटनास्थळ परिसरातील सीसीटीव्ही फुटेजची तपासणी आणि तांत्रिक विश्लेषणाच्या आधारे आरोपींचा मार्ग काढण्यात आला. मोबाईल लोकेशनच्या मदतीने दिवा वेस्ट परिसरात छापा टाकून अवघ्या १२ तासांत मुख्य आरोपी आकाश गौरीशंकर बिराजदार वय २९याच्यासह दिवाकर महेशचंद्र गुप्ता वय १८ आणि आलिफ शहादाब खान वय १८ या तिघांना अटक करण्यात आली.

पोलिस तपासात उघड झाले की, जुन्या वैमनस्यातूनच हा खून करण्यात आला. आरोपींनी कोयता व चाकूने नरेंद्र जाधव यांच्यावर ४० वार करून त्यांचा खून केला तसेच फिर्यादी शुभम पांडे यांना जीवे ठार मारण्याचा प्रयत्न केला. पुढील तपास डोंबिवली पोलीस करत असून इतर सहभागी आरोपींचा शोध सुरू आहे.