Devabhau Taxi : मुंबईकरांसाठी खुशखबर! प्रवाशांच्या सेवेत येणार 'देवाभाऊ टॅक्सी', युवकांना मिळणार रोजगार

मुंबईकरांसाठी मोठी बातमी! ओला, उबेर आणि रॅपिडोसारख्या खासगी कॅब सेवांना पर्याय म्हणून लवकरच ‘देवाभाऊ टॅक्सी सेवा’ सुरू करण्यात येणार आहे. विशेष म्हणजे, ही सेवा परवडणाऱ्या दरात उपलब्ध होणार असल्याने सर्वसामान्य मुंबईकरांना कमी खर्चात प्रवासाचा पर्याय मिळणार आहे.

भाजप आमदार प्रवीण दरेकर यांच्या संकल्पनेतून ही सेवा सुरू करण्यात येत आहे. या उपक्रमामुळे प्रवाशांना स्वस्त आणि दर्जेदार सेवा मिळण्यासोबतच हजारो युवकांना रोजगाराच्या संधी उपलब्ध होणार आहेत. प्रवीण दरेकर यांनी सांगितले की, ‘भारत टॅक्सी’च्या धर्तीवर मुंबई आणि एमएमआर परिसरात ‘देवाभाऊ सेवा सहकारी टॅक्सी’ आणि ‘छावा टॅक्सी सेवा’ सुरू केली जाणार आहे.

यासंदर्भात चर्चा पूर्ण झाली असून वाहतूक मंत्री प्रताप सरनाईक यांनी आवश्यक धोरण निश्चित केले आहे. या योजनेच्या पहिल्या टप्प्यात एमएमआर परिसरात 2,000 ते 5,000 टॅक्सी सुरु करण्यात येतील. दरम्यान, भाजप आमदार प्रसाद लाड यांनीही या प्रकल्पाबाबत महत्त्वाची माहिती दिली आहे.

मुंबई बँकेच्या माध्यमातून किमान 3,000 तरुणांना टॅक्सी उपलब्ध करून दिली जाणार आहे. यासाठी अडाणी विमानतळ व्यवस्थापनासह विविध हॉटेल्स आणि संस्थांशी प्राथमिक चर्चा पूर्ण झाली आहे. टॅक्सी मिळणाऱ्या युवकांना आवश्यक परवान्यांसह व्यवसायाची संधी दिली जाणार आहे. या प्रकल्पामुळे थेट 3,000 तरुणांना रोजगार मिळेल. आता ही सेवा प्रत्यक्षात कधी सुरू होते याकडे मुंबईकरांचे लक्ष लागले आहे.