''ही तर सिनेमाची स्टोरी...जी तुम्हाला नेटफ्लिक्सवर बघता येईल''!

पुणे: झारखंड सरकार पाडण्यामध्ये माझे नाव घेऊन केला जाणारा आरोप खूप हास्यास्पद आहे. ही तर एखाद्या सिनेमाची स्टोरी आहे. सध्या सिनेमा थिएटर सुरु नाहीत, पण ही स्टोरी नेटफ्लिक्सवर दाखवता येईल अशी टिप्पणी माजी ऊर्जामंत्री चंद्रशेखर बावनकुळे यांनी काँग्रेसचे प्रदेशाध्यक्ष नाना पटोले यांच्यावर केली आहे. पुण्यामध्ये आयोजीत युवा वॅारियर्सच्या कार्यक्रमात बावनकुळे बोलत होते.

मी राज्यातील भाजपचा नेता आहे मी काही राष्ट्रीय नेता नाही तसेच झारखंडचा प्रभारीही नाही, माझ्या 51 वर्षांच्या आयुष्यात मी कधीही झारखंडला गेलो नाही, आणि झारखंडची सीमादेखील बघितलेली नाही, झारखंडच्या काँग्रेस पक्षाच्या नेत्यानेच काल याबाबत योग्य गोष्टी जाहीर केल्या आहेत,  त्यामुळे माझ्यावर आरोप करणारे  पटोले तोंडघशी पडले आहेत टोला त्यांनी नाना पटोले यांना लगावला, 

ओबीसी समाजाचे राजकीय आरक्षण महाविकास आघाडीच्या नाकर्तेपणामुळे गेले आहे त्यामुळे ओबीसी समाजात प्रचंड आक्रोश आहे, डिसेंबर पर्यंत ओबीसी आरक्षणाचा डेटा तयार झाला नाही तर 2022च्या निवडणुका या ओबीसीविना होतील असा इशारा असे मत दिला आहे, 31 जुलै 2019  देवेंद्र फडणवीस सरकारने अध्यादेश काढून ओबीसींना दिलेले राजकीय आरक्षण योग्य असल्याचे सांगितले होते, मात्र महाविकास आघाडी सरकार सत्तेत आल्यानंतर त्यांनी हा वटहुकूम रद्द केला, ओबीसी आरक्षणासाठी हे सरकार काहीही हालचाल करत नाही,आजही तीन महिन्यात डेटा तयार करुन आरक्षण मिळू शकते, पाच एजन्सीना काम देऊन मराठा आरक्षणाचा डेटा 3 महिन्यात तयार झाला मात्र ओबीसी आरक्षणाच्या डेटा तयार करण्याबाबत अद्याप  कार्यवाही झाली नसल्याचे बावनकुळे यांनी सांगितले,

दरम्यान शिवसेनेचे खासदार संजय राऊत यांनी मुख्यमंत्री उद्धव ठाकरे यांच्या केंद्रीय नेतृत्वाबाबत केलेल्या वक्तव्यावर बोलताना बावनकुळे म्हणाले की उध्दव ठाकरेंनी जर केंद्राचं नेतृत्व केलं आम्ही त्याचे स्वागत करतो, पण त्याआधी राज्यातील सरकार  टिकवता आले पाहिजे, दरम्यान भाजप नेत्या पंकजा मुंडे नाराज असण्याच्या मुद्द्यावर बावनकुळे म्हणाले की पंकजा मुंडे या आमच्या राष्ट्रीय नेत्या आहेत, त्या नाराज नाहीत , विरोधक अशा बातम्या मुद्दाम पसरवत आहेत.