Pune News: महाराष्ट्रात चाललंय काय? डोकं, हात-पाय कापून धड नदीत फेकलं, पुण्यात तरुणीची निर्घृण हत्या

बदलापूरमध्ये चिमुरडींवर अत्याचार झाल्याची घटना ताजी असतानाच पुणे, कोल्हापूर, चंद्रपूरमध्ये मुली, तरुणींवरील अत्याचाराच्या घटना घडल्या आहेत. त्यामुळे चोहोबाजूनी पोलिस यंत्रणांच्या कार्यशैलीबाबत संताप व्यक्त होतोय.

हे कमी होतं की काय पुण्यात सगळ्यांनाच हादरवणारी घटना घडली आहे. खराडी येथील नदीपात्रालगत एका तरुणीचे फक्त धड आढळून आल्यानं खळबळ उडाली आहे. या तरुणीची दोन-तीन दिवसांपूर्वी हत्या झाल्याचा अंदाज आहे. आरोपीला पकडण्याचं मोठ आव्हान पोलिसांसमोर आहे.

दरम्यान राज्यात महिला अत्याचाराच्या घटनांमध्ये वाढ झाली आहे. यावरुन विरोधकांनी सरकारवर हल्लाबोल केलाय. गुन्हेगारांवर लगाम नाही, अशी अशी टीका काँग्रेसनं केली आहे.

पुण्यात गेल्या तीन दिवसांपासून मुसळधार पाऊस सुरू आहे. मुठा नदीत मोठ्या प्रमाणावर पाण्याचा विसर्ग सुरू आहे. हत्या करुन मृतदेह नदीपात्रात टाकणा-या आरोपीपर्यंत पोलिस पोचतीलच...मात्र ड्रग्ज रॅकेट, ड्रंक अँण्ड ड्राईव्ह आणि कोयता गँगचा धुमाकूळ सुरु असलेल्या पुण्यात पोलिसांचा खुळखुळा झाल्यामुळे गुन्हेगारांना थोडासाही धाक राहिला नाही हेही तेव्हढंचं खरं आहे.