Mumbai Local : मुंबईकरांसाठी खुशखबर! लोकलच्या ताफ्यात येणार नॉन-एसी ऑटोमॅटिक दरवाजांची ट्रेन; वाचा सविस्तर

मुंबईकरांसाठी गुड न्यूज! मुंबईकरांचा श्वास असलेल्या लोकल सेवेत आमूलाग्र बदल होणार आहेत. या बदलामुळे प्रवाशांचा प्रवास आरामदायी होणार आहे. लोकलच्या ताफ्यात लवकरच देशतील पहिली नॉन-एसी ऑटोमॅटिक दरवांची लोकल ट्रेन येणार आहे. येत्या २ दिवसांत ही लोकल ताफ्यात उपलब्ध होण्याची शक्यता आहे.

गेल्या वर्षभरात मुंबई लोकलमधून पडून अनेकांनी जीव गमावल्याच्या घटना कानावर आल्या. या घटना दुर्दैवी असून प्रवाशांचा निष्काळजीपणा दर्शवते. मात्र आता या घटना रोखण्यासाठी रेल्वेने मोठे पाऊल उचलले आहे. प्रवाशांचा लटकून प्रवास करणं यामुळे कायमच बंद होणार आहे.

नॉन-एसी ऑटोमॅटिक दरवाजांची ही लोकल ट्रेन आज किंवा उद्या सोलापूर मार्गे मुंबईत आणण्यात येणार असून तिला थेट मुंबईतील कुर्ला कारशेडमध्ये आणण्यात येईल. त्यानंतर तिथे या लोकलची चाचणी होईल. सर्व तांत्रिक चाचण्या यशस्वी झाल्यानंतर ती प्रवाशांच्या सेवेत दाखल होईल असे अधिकाऱ्यांनी सांगितले आहे.

१२ डब्यांच्या साध्या लोकलला एसी लोकलप्रमाणे स्वयंचलित दरवाजे बसवण्यात आले आहेत. यातील रेल्वे गाड्या आज किंवा उद्या लोकलच्या ताफ्यात दाखल होणार आहेत. ही लोकल गाडी चैन्नईच्या इंटिग्रल कोच फॅक्टरीत तयार झालेली आहे. त्याचे दरवाजे आपोआप चालू बंद होतात.

त्यामुळे प्रवाशांना बाहेर लटकता येणार नाही. शिवाय रेल्वेत चढता उतरताना अधिक काळजी घेणे गरजेचे आहे. एकदा दरवाजा बंद झाला तर बाहेरील प्रवाशाला आतमध्ये प्रवेश करता येणार नाही. गाडी थेट दुसऱ्या स्थानकावर गेल्यानंतरच त्याचे दरवाजे खुले होतील. तसेच या लोकलचे दरवाजे बंद असले तरी या लोकलमध्ये कोणतीही एसीची सुविधा नसणार.