BMC: सहा महिन्यांत नव्या गाड्या, BMCत उधळपट्टी; पदाधिकाऱ्यांना स्कॉर्पिओ नको, इनोव्हा हवी

आशियातील सर्वात श्रीमंत महापालिका असं बिरुद मिरवणाऱ्या मुंबई महापालिकेच्या तिजोरीत लवकरच खडखडाट होण्याची शक्यताये. कारण, बीएमसीतल्या पदाधिकाऱ्यांच्या अचानक उफाळून आलेल्या पाठदुखीवर आता मुंबईकरांच्या कोट्यावधी रुपयांची उधळपट्टी होणार आहे. केवळ ६ महिन्यांपूर्वी कोट्यवधी रुपये खर्चून खरेदी केलेल्या ब्रँड न्यू स्कॉर्पिओ गाड्यांनी म्हणे या नेत्यांना पाठदुखी सुरु झालीये आणि याच पाठदुखीचं कारण पुढे करत या पदाधिकाऱ्यांनी थेट २५ लाखांच्या अलिशान पाठदुखी फ्री इनोव्हा क्रिस्टा गाड्यांची मागणी केलीये, आता नक्की कोणाकोणाला या स्कॉर्पिओने पाठदुखीचा झटका दिलाय? पाहा.

कोणाला हवी इनोव्हा?

उपमहापौर

सभागृह नेते

स्थायी समिती अध्यक्ष

शिक्षण समिती अध्यक्ष

सुधार समिती अध्यक्ष

सहा विशेष समित्यांचे अध्यक्ष

मुंबई महापालिकेतल्या पदाधिकाऱ्यांच्या मागणीवरून ठाकरेसेनेचे खासदार संजय राऊत यांनी थेट पंतप्रधानांनाच लक्ष्य केलंय. तर भाजपनं राऊतांवर पलटवार केलाय. खुद्द महापौरांनी उधळपट्टीचं समर्थन केल्याने मनसे नेते संदीप देशपांडे यांनी या अजब मागणीचे धिंडवडे काढत थेट दुकानात जाऊन ६ गाड्यांची खरेदी करून महापालिकेच्या दारात पाठवण्याची घोषणा करत त्यांची खिल्ली उडवीलेय.

२०२२ मध्ये लाँच होताच अवघ्या ३० मिनिटांत १ लाख गाड्यांच्या बुकिंगचा ऐतिहासिक विक्रम या कारने केलाय. आज देशात साडेचार लाखांहून अधिक लोक हीच गाडी चालवतायत. मग प्रश्न असाये की, ज्या गाडीने देशातील लाखो लोकांची मनं जिंकली, तिने केवळ बीएमसीच्याच पदाधिकाऱ्यांची पाठ का मोडली? मुंबईतल्या मुंबईत फिरताना या नेत्यांची पाठ नक्की गाडीमुळे दुखतेय, की रस्त्यांवर पडलेल्या खड्ड्यांमुळे? २५ लाखांच्या अलिशान इनोव्हा मागणाऱ्या या पदाधिकाऱ्यांनी गाडी बदलण्यापेक्षा, आधी मुंबईतले रस्ते सुधारून खड्डे बुजवलेत तरी गाड्या बदलण्याची वेळ येणार नाही.