Mumbai Crime News: मोठी बातमी! निवडणूक आयोगाच्या स्थिर सर्वेक्षण पथकावर हल्ला

संजय गडदे, साम टीव्ही

मुंबई महापालिका निवडणुकीसाठी राजकीय पक्षांची लगबग सुरू झाली आहे. अनेक राजकीय पक्षांच्या इच्छुक उमेदवारांनी नेते मंडळीच्या गाठीभेटी सुरू केल्या आहेत. दुसरीकडे निवडणूक आयोगाचे कर्मचारी राजकीय पक्षांच्या कार्यकर्त्यांच्या हालचालीवर लक्ष ठेवून आहेत. या निवडणुकीदरम्यान आयोगाच्या स्थिर सर्वेक्षण पथकावरच हल्ला झाल्याची घटना घडली आहे. पथकावर शनिवारी मध्यरात्री झालेल्या हल्ल्यामुळे एकच खळबळ उडाली आहे.

मुंबईतील विलेपार्लेच्या पोलीस स्टेशनच्या हद्दीत निवडणूक आयोगाचा स्थिर सर्वेक्षण पथकावर हल्ला झाल्याची घटना घडली. या प्रकरणी पोलिसांनी या पथकावर हल्ला करणाऱ्या व्यक्तीवर गुन्हा दाखल करण्यात आला आहे.निवडणुका आयोगाच्या स्थिर पथकाकडून विलेपार्लेच्या मिलन सबवेजवळ शनिवारी मध्यरात्री दीडच्या सुमारास नाकाबंदी लावून गाड्यांचे तपासणी सुरू होती.

एका कारमध्ये मध्यरात्री चार जण बसून आले. त्यांनी निवडणूक आयोगाच्या स्थिर सर्वेक्षण पथकातील व्हिडिओग्राफरवर हल्ला केला. या हल्ल्यात व्हिडिओग्राफर गंभीर जखमी झाला. त्यानंतर मुंबई महानगरपालिका अधिकाऱ्यांनी विलेपार्ले पोलीस स्टेशनमध्ये हल्ला करणाऱ्या व्यक्ती विरोधात गुन्हा दाखल केला. गुन्हा दाखल केल्यानंतर विलेपार्ले पोलीस हल्ला करणाऱ्या व्यक्तीचा शोध घेत आहे.