Maharashtra Politics :...तर त्यांची व्यवस्था करू; भाजप खासदार मेधा कुलकर्णींना धमकी? राजकीय वर्तुळात खळबळ

अक्षय बडवे, साम टीव्ही

पुणे : मेधा कुलकर्णी यांनी या प्रकरणात पडू नये, अन्यथा त्यांची व्यवस्था करू. मागे त्यांचा तिकीट कापलं होतं, हे त्यांना माहिती आहे, अशा पद्धतीची धमकी यशवंत सहकारी बँकेच्या काही पदाधिकाऱ्यांकडून देण्यात आल्याची माहिती आज भाजप खासदार मेधा कुलकर्णी यांनी पत्रकार परिषद घेऊन दिली आहे.

कराड येथील यशवंत बँकेच्या 140 कोटींच्या घोटाळ्याप्रकरणी मेधा कुलकर्णी या सातत्याने आवाज उठवत आहेत. काही दिवसापूर्वी त्यांनी कराड येथे पत्रकार परिषद घेऊन ठेवीदारांची बाजू मांडली होती. यशवंत बँकेकडून जवळपास 120 हून अधिक जणांची 140 कोटी रुपयांची फसवणूक केल्याचा आरोप ठेवीदारांचा आहे.

ठेवीदारांना त्यांची रक्कम परत मिळवून देण्यासाठी खासदार मेधा कुलकर्णी या ठेवेदारांच्या बाजूने लढत आहेत. मेधा कुलकर्णी यांनी याआधी देखील सहकार आयुक्तांकडे पाठपुरावा केला होता. मात्र अद्यापही यामध्ये प्रशासन आणि पोलिसांकडून कोणतीही कारवाई केली जात नाही, असं कुलकर्णी यांनी म्हटलं .

केंद्रीय मंत्री अमित शहा यांना लवकरच भेटून या प्रकरणात लक्ष घालण्याची मागणी करणार असल्याचं मेधा कुलकर्णी यांनी आज म्हटलं आहे. 120 ठेवीदारांची फसवणूक केल्यानंतरही तसेच आरबीआयच्या नियमांचं उल्लंघन केल्यानंतरही यशवंत बँकेच्या पदाधिकाऱ्यांवर कोणतीही कारवाई केली जात नाही. त्यांना कोण वाचवत आहे, असा प्रश्न मेधा कुलकर्णी यांनी उपस्थित केला.