Ashish Shelar | 'आम्‍ही हिंदू सण... '; आशिष शेलारांनी साधला उद्धव ठाकरेंवर निशाणा

Ashish Shelar News : भाजप हा पक्ष हिंदू सण ठेवणारा, जोपसणारा, वाढवणारा पक्ष आहे. तो आमचा आत्‍मा आहे. माजी मुख्यमंत्री उद्धव ठाकरे यांच्‍या शिवसेनेप्रमाणे आम्‍ही हिंदू सण बंद करणारे नाही, अशा शब्दात मु्ंबई भाजप अध्यक्ष, आमदार अॅड आशिष शेलार (Ashish Shelar) यांनी उद्धव ठाकरेंवर जोरदार टीका केली.

मुंबई भाजपातर्फे मुंबईत सार्वजनिक गणेशोत्‍सव स्‍पर्धा आयोजित करण्‍यात आली असून यामध्‍ये 1026 मंडळे सहभागी झाली आहेत. या मंडळाचे परिक्षण करण्‍यासाठी तज्ञांची 30 पथके तयार करण्‍यात आली आहेत. आज मुंबई भाजपा कार्यालयाजवळून या पथकांच्‍या गाडयांना आमदार अॅड आशिष शेलार यांनी झेंडा दाखवून सन्‍मानाने रवाना केले.

सदर स्‍पर्धेबाबत माहिती देताना आमदार अॅड आशिष शेलार म्‍हणाले की, हिंदू सण हा भाजपाचा आत्‍मा असून आम्‍ही कोरोना काळातही सण अखंडित ठेवण्‍याचा प्रयत्‍न केला. कोरोनाचे संकट टळल्‍यानंतर दहिहंडी उत्‍सव भाजपाने जोरदार साजरा केला, आता गणेशोत्‍सवात ही भाजपा हिरहिरीने सहभागी झालो आहोत. मुंबईत सार्वजनिक गणेशोत्‍सव स्‍पर्धा जाहीर करताच त्‍याला मंडळाचां प्रचंड प्रतिसाद मिळाला असून मुंबईतील १०२६ मंडळे सहभागी झाली आहेत'.

'सहभागी गणेश मंडाळाचे परिक्षण ३० पथके करणार असून प्रत्‍येक पथकात कॅमे-यासह ३ जण असून एकूण ९० जणांचा समावेश असलेली ही पथके या सगळयांचे परिक्षण करणार आहेत. कोराना काळात दुदैवाने उद्धव ठाकरे यांच्‍या शिवसेनेने १०० वर्षांची लालबागच्‍या राजाची परंपरा खंडित केली. अशा प्रकारे हिंदु सणांना विरोध करणारे आम्‍ही नाही, भाजपा सणांची परंपरा जोपासणारा पक्ष आहे, असा टोलाही आशिष शेलार यांनी यावेळी लगावला.