Maharashtra Politics : भारतीय जनता पक्षामध्ये मोठी धुसफूस, पदनियुक्तीवरुन संघर्ष वाढल्याची चर्चा

विकास मिरगणे साम टीव्ही

Maharashtra : आगामी स्थानिक स्वराज्य संस्थांच्या निवडणुकांच्या पार्श्वभूमीवर राज्यातील सर्वच पक्षांनी जय्यत तयारी सुरु केली आहे. निवडणुकीच्या आधी नवी मुंबईत भारतीय जनता पक्षामध्ये नाराजी नाट्य सुरु असल्याची माहिती समोर आली आहे. जिल्हा कार्यकारणीमधील नियुक्तीवरुन पक्षात धुसफूस असल्याची चर्चा सुरु आहे.

मिळालेल्या माहितीनुसार, नवी मुंबई भाजप अध्यक्ष डॉ. राजेश पाटील यांनी जिल्हा कार्यकारणी जाहीर केली. या जिल्हा कार्यकारणीमध्ये वनमंत्री गणेश नाईक आणि बेलापूरच्या आमदार मंदा म्हात्रे यांच्या अनेक कार्यकर्त्यांना डावळण्यात आल्याचे म्हटले जात आहे. यामुळे पक्षात अनेकांनी नाराजी व्यक्त केल्याच्या चर्चा रंगल्या आहेत.

याशिवाय नवी मुंबई महिला जिल्हाध्यक्ष म्हणून अनेकजण स्पर्धेत असताना उज्ज्वला जगताप यांना संधी देण्यात आली. त्यामुळे महिलांनी सुद्धा भाजपच्या मुंबईतील कार्यालयात जाऊन पक्ष नेतृत्त्वाकडे नाराजी व्यक्त केली. भाजप जिल्हाध्यक्ष डॉ. राजेश पाटील यांच्या कारभारावर अनेक पदाधिकारी नाराज आहेत अशी माहिती समोर आली आहे.

महिला पदाधिकाऱ्यांनी पक्ष नेतृत्त्वाची भेट घेतल्यानंतर नवी मुंबई महिला भाजपा अध्यक्ष यांची नियुक्ती रद्द करण्यात येणार असल्याची माहिती सूत्रांकडून मिळाली आहे. नियुक्ती रद्द करा नाहीतर आक्रमक होऊन राजीनामा देऊ असा इशारा भाजप महिला पदाधिकाऱ्यांनी दिल्याचे म्हटले जात आहे. या नाराजी नाट्याची सध्या मोठी चर्चा होत आहे.