पुण्यात ठाकरे गटाला धक्का? बडा नेता अजित पवारांसोबत जाणार? नेत्याची पत्नी दादांना भेटणार

आगामी स्थानिक स्वराज्य संस्थांच्या निवडणुकीच्या पार्श्वभूमीवर राजकीय घडामोडींना वेग आला आहे. प्रत्येक नेत्याने मोर्चेबांधणीला सुरूवात केली आहे. सध्या बड्या नेत्यांकडून पदाधिकारी तसेच कार्यकर्त्यांना कानमंत्र देण्यात येत आहे. अशातच पिंपरी चिंचवडमध्ये लवकरच शिवसेना ठाकरे गटाला धक्का बसणार असल्याची शक्यता आहे. पिंपरी चिंचवडमधील बडा नेता राष्ट्रवादी काँग्रेस अजित पवार गटात जाण्याच्या तयारीत असल्याची माहिती आहे.

गेल्या काही दिवसांपासून शिवसेना ठाकरे गटाचे शहराध्यक्ष संजोग वाघेरे हे पक्षाला जय महाराष्ट्र करणार असल्याची चर्चा आहे. मात्र, अद्याप अधिकृत माहिती समोर आलेली नाही. महापालिका निवडणुकाआधी पिंपरी चिंचवडमधील बालेकिल्ला काबीज करण्यासाठी उपमुख्यमंत्री अजित पवार यांनी कंबर कसली आहे.

आज अजित पवार शहरात आहेत. याच प्रसंगी शिवसेनेचे शहराध्यक्ष संजोग वाघेरे यांच्या पत्नी उषा वाघेरे अजित दादांना भेटणार असल्याची माहिती आहे. त्यांच्यात चर्चा होणार आहे. त्यामुळे संजोग वाघेरे मशाल सोडून अजित पवार गटात जाणार का? अशी चर्चा रंगली आहे. 'मी मुळात शिवसेनेत असलो तरी, माझी पत्नी आजही राष्ट्रवादीतच आहे. मी तूर्त तरी शिवसेनेत आहे. महापालिका निवडणूक जाहीर झाल्यावर पाहुयात', असं ते म्हणाले

काही दिवसांपूर्वी गणेशोत्सवाच्या निमित्ताने पार्थ पवार यांनी संजोग वाघेरे यांची निवासस्थानी भेट घेतली. गणेशोत्सवाच्या निमित्ताने ही सदिच्छा भेट असल्याचं ते म्हणाले. मात्र, या भेटीनंतर राजकीय वर्तुळात चर्चांना उधाण आलं. जर या चर्चा खऱ्या ठरल्या तर, पिंपरी चिंचवडमध्ये आगामी स्थानिक स्वराज्य संस्थांच्या निवडणुकांच्या पार्श्वभूमीवर ठाकरे गटाला जोरदार धक्का बसेल.