Badlapur : बदलापुरात उघड्यावर मासे विक्रीवर बंदी, प्रशासनाचा मोठा निर्णय

मयुरेश कडव, बदलापूर

बदलापूर शहरातील बेकायदेशीर मच्छी विक्रेत्यांविरोधात आता प्रशासन आक्रमक झालेलं पाहायला मिळतं आहे. शहरात ठिकठिकाणी बसणाऱ्या मच्छी विक्रेत्यांमुळे दुर्गंधी आणि अस्वच्छता वाढत असल्याचा आरोप करत माजी नगराध्यक्ष राजेंद्र घोरपडे यांनी कारवाईचा इशारा दिला आहे. दरम्यान या कारवाईचा मासळी विक्रेत्यांना मोठा फटका बसणार असून आता पुढे या प्रकरणात काय होते हे पाहणे महत्त्वाचे ठरेल.

बदलापूर शहरात स्वच्छ भारत अभियानांतर्गत स्वच्छतेवर विशेष भर दिला जात असून यापूर्वी शहराला दोन वेळा संत गाडगेबाबा स्वच्छता अभियान पुरस्कारही मिळाला आहे. याच पार्श्वभूमीवर नगराध्यक्ष आणि सर्व नगरसेवकांकडून प्लास्टिक बंदी आणि स्वच्छता मोहीम राबवली जात असल्याची माहिती माजी नगराध्यक्ष राजेंद्र घोरपडे यांनी दिली आहे.

तसेच वसईसह विविध भागांतून येणारे मच्छी विक्रेते बदलापूरमधील प्रमुख चौक आणि नाक्यांवर बसून विक्री करतात. काही ठिकाणी मनाई असतानाही रस्त्याच्या कडेला मच्छी विक्री होत असल्यानं त्या परिसरात दुर्गंधी आणि घाणीचं साम्राज्य पसरत आहे. संध्याकाळी मच्छी विक्री संपल्यानंतर अनेक विक्रेते कचरा आणि घाण तशीच सोडून जात असल्यानं नागरिकांनाही मोठा त्रास सहन करावा लागत आहे.

शहर पुन्हा एकदा स्वच्छता अभियानात अव्वल क्रमांकावर यावं यासाठी नागरिकही सहकार्य करत असल्याचं घोरपडे यांनी सांगितल आहे. दरम्यान, मच्छी विक्रेत्यांनी प्रशासनानं निश्चित करून दिलेल्या जागेवरच व्यवसाय करावा, अन्यथा कारवाई केली जाईल, असा इशाराही त्यांनी दिला आहे. तसेच सर्व मच्छी विक्रेत्यांनी एकत्र येऊन प्रशासनाची भेट घ्यावी, त्यानंतर योग्य जागा निश्चित करून परवानगी दिली जाईल, असंही माजी नगराध्यक्ष राजेंद्र घोरपडे यांनी स्पष्ट केलंय.