चंदेरी गडावर पुन्हा अपघात; तरुण 300 फूट दरीत कोसळला, दोन दिवसांत दुसरी गंभीर घटना

चंदेरी गडावर दोन दिवसांत दुसरा मोठा अपघात

मुंबईतील तरुण 300 फूट खोल दरीत कोसळून गंभीर जखमी

रेस्क्यू टीमच्या मदतीने तरुणाला सुखरूप बाहेर काढण्यात यश

मागील अपघातात गिर्यारोहकाचा मृत्यू झाल्याची धक्कादायक घटना

प्रशासनाकडून पर्यटक व गिर्यारोहकांना सावधानतेचा इशारा

मयूरेश कडव, साम टीव्ही

बदलापूर जवळील चंदेरी गडावर फिरण्यासाठी आलेला एक तरुण पाय घसरून पडून गंभीर जखमी झालाय. अश्विन आचरेकर असं या तरुणांच नाव असून तो मुंबई येथील सांताक्रुज परिसरात राहणारा आहे. अश्विन हा त्याच्या मित्रासोबत चंदेरी गडावर फिरण्यासाठी आला होता. परतीच्या प्रवासात अश्विनचा पाय घसरला आणि तो 300 फूट खोल दरीत कोसळला. त्यानंतर रेस्क्यू टीमच्या मदतीने अश्विनला सुखरूप बाहेर काढण्यात आलं.

या दुर्घटनेत अश्विनच्या हातापायाला गंभीर दुखापत झालीये. पहाटे साडेचार वाजता तामसाई गावात अश्विनला कुटुंबियांकडे सोपवण्यात आलं. धक्कादायक बाब म्हणजे दोन दिवसांपूर्वीच एका गिर्यारोहकाचा चंदेरी गडावरून पडून मृत्यू झाला होता. लागोपाठ घडलेल्या या दोन अपघातांमुळे चंदेरी गडावर येणाऱ्या गिर्यारोहकांनी तसच पर्यटकांनी काळजी घेण्याचं आवाहन प्रशासनाकडून करण्यात येत आहे.

काही दिवसापूर्वीच याच गडावर एका गिर्यारोहकाचा पाय घसरल्याने थेट दरीत कोसळला आणि त्याची दुर्दैवी मृत्यू झाला होता. रोहित गुप्ता असे मृत गिर्यारोहकाचे नाव होते. तो टिटवळा येथील रहिवासी होता. रोहित गुप्ता आणि त्याचा मित्र अजय पंडम हे दोघे 1 तारखेला चंदेरी गडावर ट्रेकिंगसाठी गेले होते. ट्रेक पूर्ण करून परतीच्या प्रवासात असताना अचानक रोहितचा पाय घसरला आणि तो सुमारे 500 ते 600 फुट खोल दरीत जाऊन कोसळला.

धक्कादायक बाब म्हणजे अवघ्या दोन दिवसांपूर्वीच चंदेरी गडावरून पडून एका गिर्यारोहकाचा मृत्यू झाला होता. लागोपाठ घडलेल्या या दोन घटनांमुळे चंदेरी गडावरील सुरक्षिततेचा प्रश्न पुन्हा ऐरणीवर आला आहे. दरम्यान, चंदेरी गडावर येणाऱ्या गिर्यारोहकांनी आणि पर्यटकांनी विशेष काळजी घ्यावी, योग्य तयारी, सुरक्षा साधने आणि हवामानाची माहिती घेऊनच ट्रेकिंग करावे, असे आवाहन प्रशासनाकडून करण्यात आले आहे.