Accident : त्र्यंबकेशवरून परतणाऱ्या भाविकांवर काळाचा घाला, नियंत्रण सुटलेला पीकअप दुचाकीवर कोसळला अन्...

नाशिक मधील त्र्यंबकेश्वर मार्गावर दर्शन घेऊन परतणाऱ्या भाविकांवर काळाने घाला घातला आहे. भरधाव वेगात असलेला दगडांनी भरलेला टिपर उलटल्याने दोन पर्यटकांचा मृत्यू झाला आहे. शनिवारी दुपारी हा भीषण अपघात घडला असून संपूर्ण प्रकार सीसीटीव्ही कॅमेऱ्यात कैद झाला आहे. पोलीस या घटनेचा सविस्तर तपास करत असून मृत व्यक्तींच्या कुटुंबियांवर शोककळा पसरली आहे.

मिळालेल्या माहितीनुसार, त्र्यंबकेश्वर येथे दर्शन घेऊन दुचाकीवरून परतत असताना दुपारी साडेतीनच्या सुमारास हा अपघात झाला. शिवम राजेश उबेरहांडे आणि भूमिका समाधान खेडेकर अशी मृतांची नावे आहेत. ते MH १५ AY ६५ क्रमांकाच्या दुचाकीवर होते.

त्र्यंबकेश्वर गेस्टहाऊसजवळ उतारावरून येणारा टिपर समोरून चुकीच्या बाजूने येणाऱ्या सिलिंडरने भरलेल्या ‘छोटा हत्ती’ टेम्पोला वाचवण्याच्या प्रयत्नात अचानक ब्रेक लावल्याने उलटला. टिपरमधील दगड दुचाकीस्वारांवर कोसळल्याने दोघांचा जागीच मृत्यू झाला.

घटनेची माहिती मिळताच त्र्यंबकेश्वर पोलिसांनी घटनास्थळी धाव घेतली. जेसीबीच्या मदतीने टिपर बाजूला करण्यात आला. पंचनामा पूर्ण करण्यात आला असून त्र्यंबकेश्वर पोलीस ठाण्यात गुन्हा दाखल करण्यात आला आहे.