Pune Koyta Gang Crime: कोयता गँगची दहशत कायम, ६ जणांकडून तरुणावर कोयत्याने सपासप वार

Pune News : पुण्यात गेल्या काही दिवसांपासून कोयता गँगने दहशत माजवली आहे. पुणे पोलिसांकडून कोम्बिंग ऑपरेशन करून देखील कोयता गँगची दहशत कमी होत नाही. कोयता गँगचा पुन्हा एकदा धक्कादायक प्रकार समोर आला आहे. खेडमध्ये कोयता गँगने एका तरुणाची निर्घृण हत्या केली आहे. या घटनेने परिसरात एकच खळबळ उडाली आहे. (Latest Marathi News)

पुण्यातील (Pune) खेड तालुक्यातील चांदुस येथे 6 जणांनी जुन्या भांडणाच्या वादातून कोयत्याने तोंडावर सपासप वार करत तरुणाची निघृण हत्या केली आहे. गुरुवारी रात्रीच्या सुमारास शुभम काळे नावाच्या तरुणाची निघृण हत्या झाल्याची घटना घडली आहे.

नेमकं काय घडलं?

गुरुवारी रात्रीच्या अंधाराचा फायदा घेत चांदुस येथील माळरानालगत शुभमला अडवून तोंडावर,हात,पाठीवर कोयत्याने वार करुन आरोपी पसार झाले. यावेळी रक्ताच्या थारोळ्यात पडलेल्या शुभमला स्थानिक तरुणांनी उपचारासाठी राजगुरुनगर येथील खाजगी रुग्णालयात दाखल केले.

मात्र, शुभमचा उपचारादरम्यान मृत्यू झाला. या प्रकारामुळे खेड तालुक्यातील ग्रामीण भागातही कोयता गँग सक्रिय झालीय का, अशी चर्चा सुरु झाली आहे.

आधारकार्डवर मिळणार कोयता

शहरात गेल्या काही दिवसांपासून बऱ्याच घटनांमध्ये कोयत्याचा वापर दिसून येत आहे. त्यामुळे पोलीस आयुक्त यांच्या आदेशानुसार सध्या शहरात कोयता खरेदीसाठी आधार कार्डवर देण्याचा निर्णय घेण्यात आला होता.

यात कोयता कुणी विकत घेतला याची माहिती पोलिसांना मिळणार असल्याने हा निर्णय घेतला. कोयता गँगने दहशत माजवल्याने निर्णय घेतला होता. मात्र, तरीही खेड तालुक्यात कोयता गँगने धक्कादायक प्रकार केला आहे. यामुळे पोलिसांकडून (Police) कोम्बिंग ऑपरेशन करून देखील कोयता गँगची दहशत कायम असल्याचे दिसून येत आहे.