Nagpur Indira Gandhi Hospital: महिला डॉक्टर म्हणून रुग्णालयात बुरखा घालून फिरायचा तरुण, सुरक्षा रक्षकाने हटकले अन्...

Nagpur News: नागपूरच्या इंदिरा गांधी शासकीय रुग्णालयात (Indira Gandhi Government Hospital) एक धक्कदायक घटना घडली आहे. या रुग्णालयामध्ये महिला डॉक्टर असल्याचे भासवून एक तरुण बुरखा खालून फिरत होता. महिला सुरक्षा रक्षकांनी हटलकल्यानंतर हा धक्कादायक प्रकार उघड झाला. नागपूरच्या तहसील पोलिसांनी या तरुणाला अटक केली आहे. जावेद शेख शफी शेख असं या तरुणाचे नाव आहे. तो हे कृत्य का करत होता याचा तपास पोलिसांकडून सुरु आहे.

मिळालेल्या माहितीनुसार, नागपूरच्या इंदिरा गांधी शासकीय रुग्णालयामध्ये गेल्या 15 दिवसांपासून एक महिला बुरखा घालून फिरत होती. ही महिला स्वत:ला डॉक्टर असल्याचे सांगत फिरत होती. रुग्णालयामध्ये नवीन बुरखाधारी डॉक्टर आली असल्याचे सर्वांना वाटत होते. पण या महिला डॉक्टराच्या हालचाली संशयास्पद असल्याचे महिला सुरक्षारक्षकांना वाटले. त्यामुळे या सुरक्षारक्षकांनी या महिला डॉक्टरला हटकले.

त्यानंतर त्यांनी या महिला डॉक्टरबद्दल पोलिसांना सांगितले. नागपूरच्या तहसील पोलिसांनी या महिला डॉक्टरला पोलीस ठाण्यात नेऊन चौकशी केली. तर धक्कादायक प्रकार समोर आला. या महिला डॉक्टरचा चेहरा पाहून पोलिसही चक्रावले. कारण गेल्या काही दिवसांपासून जी बुरखाधारी महिला डॉक्टर म्हणून रुग्णालयात फिरत होती ती डॉक्टर नाहीच. तर महिला नसून पुरुष असल्याचे उघड झाले.

एक तरुण गेल्या काही दिवसांपासून बुरखा घालून महिला डॉक्टर म्हणून रुग्णालयात फिरत असल्याचे उघड झाले. पोलिसांनी या तरुणाला अटक केली आहे. जावेद शेख असं या तरुणाचे नाव असून तो नागपूरमधील ताजबाग परिसरात राहतो. पोलिसांनी त्याची झडती घेतली असता त्यांना तीन मोबाईल सापडले. हा तरुण रुग्णालयात आलेल्या फक्त पुरुषांशीच गप्पा मारयचा. नेमकं त्याने हे असं कृत्य का केलं? तो मोबाईल चोरी करत होता का? या सर्व बाजूंनी पोलीस तपास करत आहे. पोलिसांकडून आरोपीची चौकशी सुरु आहे.