Zila Parishad School: यॅक यॅक! शाळेतील पोषण आहाराच्या चॉकलेटमध्ये अळ्या; यवतमाळमधील धक्कादायक घटना

यवतमाळ : जिल्ह्यात शालेय पोषण आहारासंदर्भात धक्कादायक बातमी समोर आलीय. जिल्ह्यातील उमरखेड तालुक्यात असणाऱ्या चातारी येथील जिल्हा परिषदेच्या शाळेतील विद्यार्थ्यांना शालेय पोषण आहार दिला जात आहे. या आहाराच्या चॉकलेटचे वितरण करण्यात येत असून या मिलेट्स चॉकलेटमध्ये चक्क अळ्या आढळून आल्यात.

मिलेट्स चॉकलेटमध्ये अळ्या आढळून आल्याने जिल्हा परिषदेतर्फे देण्यात येणाऱ्या शालेय पोषण आहाराच्या पौष्टिकतेवर प्रश्न चिन्ह उपस्थितीत होत आहेत.दरम्यान जस्ट युनिर्व्हसल कंपनीकडून पोषण आहार जिल्हा परिषदेच्या शाळांना पुरवला जातो. परंतु यवतमाळमधील पोषण आहारात अळ्या आढळून आल्याने कंपनीच्या गुणवत्तेवर प्रश्न केले जात आहेत. प्रशासन या कंपनीवर काय कारवाई करणार हे पहावे लागणार आहे.

मिळालेल्या माहितीनुसार, चातारी प्राथमिक मुलींची कन्या शाळेत मुख्याध्यापकांनी विद्यार्थ्यांना पोषण आहार म्हणून चॉकलेट वाटपाच्या सूचना दिल्या होत्या. काही पालकांनी मिलेट्सच्या चॉकलेट घरी नेले. यातील काही पालकांनी नेलेल्या चॉकलेटमध्ये पांढऱ्या रंगाच्या आळ्या असल्याचे आढळून आलं. त्यानंतर सर्व पालकांनी मुख्याध्यापकांना हे चॉकलेट परत आणून दिले.

दरम्यान जस्ट युनिव्हर्सल प्रायव्हेट लिमिटेड या कंपनीने ३० ग्रॅम प्रति याप्रमाणे रागी, जवार आणि बाजरा या तीन प्रकारचे चॉकलेट विद्यार्थ्यांना एप्रिल महिन्याच्या मध्यामध्ये शाळेत ठेकेदारांनी पोहोचवले होते माहिती प्राथमिक स्वरुपात मिळालीय.