Yavatmal Crime : एसबीआयच्या दोन एटीएममध्ये छेडछाड; सव्वा लाखांची रोकड लंपास, चोरटे सीसीटीव्हीमध्ये कैद

संजय राठोड 

यवतमाळ : रात्रीच्या अंधारात चोरट्यांकडून बँक एटीएम मशीन लक्ष केले जात आहेत. गॅस कटरच्या सहाय्याने एटीएम मशीन तोडून किंवा छेडछाड करून यातील रक्कम लांबविली जात आहे. अशाच प्रकारे यवतमाळ शहरात एसबीआय बँकेच्या दोन एटीएम मशीनमध्ये चोरट्यांनी छेडछाड करत यातून साधारण सव्वा लाख रुपयांची रोकड लांबविल्याची घटना समोर आली आहे. मशीनमध्ये छेडछाड करताना चोरटे सीसीटीव्ही कॅमेरात कैद झाले आहेत. 

यवतमाळ येथील चिंतामणी ट्रॅव्हल्स पॉइंटसमोरील आणि उमसरा परिसरातील एस.बी.आय.ची दोन एटीएममध्ये छेडछाड करण्यात आली आहे. बसस्थानक चौकापासून हाकेच्या अंतरावर ट्रॅव्हल्स पॉइंट असून याच परिसरात एस.बी.आय.चे एटीएम केंद्र आहे. या मार्गावर रात्रीही वर्दळ असते. अशा स्थितीत तीन ते चार अनोळखी लोकांनी एटीएममध्ये प्रवेश करून मशिनमध्ये छेडछाड केल्याचे दिसून येत आहे. 

सव्वा लाखाची रोकड लांबविली 

चोरट्यांनी दोन एटीएम मशीन लक्ष केले होते. यातील ट्रॅव्हल्स पॉईंट येथील एटीएम मशिनमधून एक लाखाच्या रकमेची चोरी केली. तसेच उमरसरातील एस.बी.आय. शाखेच्या एटीएम केंद्रातही चोरट्यांनी १४ हजार २०० रुपये अशी एकूण १ लाख १४ हजार २०० रुपयांची रोकड लंपास केली आहे. दरम्यान चोरटे सीसीटीव्ही कॅमेरात कैद झाले असून त्या आधारे पोलीसांकडून तपास सुरु करण्यात आला आहे.  

करमाळ्यात अवैध देशी विदेशी दारू जप्त
पंढरपूर : अवैध देशी विदेशी दारूची वाहतूक करणारे वाहन पकडून करमाळा पोलिसांनी कारवाई केली आहे. कारवाई दरम्यान ४७ हजार रूपयांचा विविध कंपन्याचा अवैध देशी‌ विदेशी दारूसाठा व गाडी असा एकूण पाच लाख ४७ हजार रूपयांचा मुद्दे माल जप्त करण्यात आला आहे. या प्रकरणी माढा येथील सदाशिव अजय मराठे (वय २८) याच्या विरोधात पोलिसांनी गुन्हा दाखल केला आहे.