Washim Accident: वाशिममध्ये ३ वाहनांचा विचित्र अपघात, तिघांचा जागीच मृत्यू; ३ जण गंभीर

मनोज जैस्वाल, वाशिम

वाशिममध्ये भीषण अपघाताची घटना घडली आहे. वाशिमच्या कारंजा तालुक्यातील कारंजा - पोहा मार्गावरील तुळजापूर धरणाजवळ पीकअप, प्रवासी ऑटो आणि अन्य एक ऑटो अशा तीन वाहनांचा भीषण अपघात झाला. या अपघातात एका महिलेसह दोन जणांचा जागीच मृत्यू झाला. तर ८ जण जखमी झाले आहेत. जखमींमधील तिघाची प्रकृती चिंताजनक आहे. हा अपघात ऐवढा भीषण होता यामध्ये वाहनांचा अक्षरशः चुराडा झाला आहे.

मिळालेल्या माहितीनुसार, पीकअप वाहन भरधाव वेगात पोहा येथून कारंजाच्या दिशेने जात होते. या वाहनाने विरुद्ध दिशेने येणाऱ्या प्रवासी ऑटोला समोरून जोरदार धडक दिली. या प्रवासी ऑटोच्या मागे दुसरा मालवाहु ऑटो येत होता. त्यालाही पीकअपची धडक बसली. तीन वाहनांच्या झालेल्या या अपघातात तीन जणांचा मृत्यू झाला. शालिनी उत्तम लोखंडे (३५ वर्षे, राहणार - बेलमंडळ), निलेश रमेश वनावसरे (२५ वर्षे, राहणार - पोहा) व मारुती पिराजी शिंदे (७० वर्षे, राहणार - मोरळ) अशी या अपघातामध्ये मृत्यू झालेल्यांची नावं आहेत.

या अपघातामध्ये आसीफ खान कलीम खान (३८ वर्षे, राहणार - पोहा), इमरान पठाण (४० वर्षे, राहणार - दीपक चौक अकोला) आणि शाहिद नाजीम खान (१३ वर्षे, राहणार - करीम नगर कारंजा) हे तिघे जण गंभीर जखमी झाले आहेत. तर निर्मला ज्ञानेश्वर मानकर (६० वर्षे राहणार - पोहा), फौजीया परवीन आसिफ पठाण (२७ वर्षे राहणार - पोहा), अशोक महादेव नितनवरे (३२ वर्षे राहणार - पोहा), मेघा अशोक नितनवरे (२८ वर्षे राहणार - पोहा) आणि पंचफुला पाचंगे (६५ वर्षे, रा. मोहगव्हाण) हे सर्वजण किरकोळ जखमी झाले आहेत.

या अपघाताची माहिती मिळाताच वाशिम पोलिसांनी घटनास्थळी धाव घेतली. त्याचसोबत सर्वधर्म आपत्कालीन संस्था आणि अन्य रुग्णवाहिका घटनास्थळी पोहोचल्या आणि त्यांनी जखमींना उपचारासाठी वाशिम येथील उपजिल्हा रुग्णालयात दाखल केले. सर्व जखमीवर उपचार सुरू आहेत. तर गंभीर जखमी झालेल्यांना पुढील उपचारासाठी अकोला येथे हलवण्यात आले आहे. ३ जखमींची प्रकृती चिंताजनक आहे. वाशिम पोलिस या अपघाताचा तपास करत आहेत.