Washim Accident : राज्यात पुन्हा 'हिट अँड रन'; भीषण अपघातात बापलेकीचा जागीच मृत्यू, पत्नी जखमी

मनोज जयस्वाल 
वाशिम : दुचाकीने घराकडे निघालेल्या परिवारावर काळाने झडप घातली आहे. वाशिम जिल्ह्यातील कारंजा- शेलुबाजार मार्गावर मुरंबी फाट्याजवळ दुपारच्या सुमारास दुचाकीला अज्ञात वाहनाने धडक दिल्याने भीषण अपघात झाला. या अपघातात बाप- लेकीचा जागीच मृत्यू झाला आहे. तर पत्नी जखमी झाली आहे. जखमी महिलेला लागलीच रुग्णालयात उपचारासाठी दाखल करण्यात आले आहे. 

वाशिम जिल्ह्यातील कारंजा- शेलूबाजार मार्गावर हा भीषण अपघात झाला आहे. या अपघातात अंबादास जावळे व त्यांची दहा वर्षाची मुलगी आरती जावळे या दोघांचा जागीच मृत्यू झाला आहे. दरम्यान अंबादास जावळे हे पत्नी आणि १० वर्षीय मुली यांना सोबत घेऊन मोपेड बाईकने कारंजा येथून धाकली किनखेड येथे जाण्यासाठी निघाले होते. दरम्यान, मुरंबी फाट्याजवळ एका अज्ञात ट्रकने त्यांच्या दुचाकीला जोरदार धडक दिली. 

दोघांचा जागीच मृत्यू 

ट्रकने जोरदार धडक दिल्याने दुचाकीवरील तिघेजण फेकले गेले. यामध्ये अपघातात अंबादास जावळे (वय ४५) आणि त्यांची मुलगी आरती जावळे (वय १०) यांचा जागीच मृत्यू झाला. तर पत्नी उषा जावळे ह्या किरकोळ जखमी झाल्या आहेत. अपघातानंतर रस्त्याने जाणाऱ्यांनी गर्दी केली होती. तर जखमी उषा जावळे यांना लागलीच उपचारासाठी रुग्णालयात दाखल करण्यात आले. 

ट्रक चालक फरार 

दरम्यान सदर अपघात घडल्यानंतर ट्रक चालक वाहनासह पसार झाला आहे. अपघाताची माहिती मिळताच पोलिसांनी घटनास्थळी धाव घेऊन अपघाताची नोंद केली आहे. तर फरार झालेल्या अज्ञात ट्रक चालकाचा शोध सुरू आहे. या हृदयद्रावक घटनेमुळे परिसरात हळहळ व्यक्त होत आहे. तर अपघातानंतर महामार्गावरील वाहतूक खोळंबली होती.