Nashik Hospital : नाशिकमध्ये २५० हुन अधिक रुग्णालयांचे फायर ऑडिटच नाही; महापालिकांकडून बजावण्यात आल्या नोटीस

तबरेज शाखा 
नाशिक : नाशिक महानगरपालिकेच्या हद्दीत असलेल्या तब्बल २५० रुग्णालयाचे फायर ऑडिट झाले नसल्याची धक्कादायक माहिती समोर आली आहे. माहितीच्या अधिकारात ही धक्कादायक माहिती समोर आली असून या नंतर नाशिक महानगरपालिका प्रशासन देखील खळबळून जागे झाले आहे. यानंतर महापालिका प्रशासनाकडून २५० रुग्णालयांना नोटिसा पाठवल्या आहे.

नाशिकच्या जिल्हा रुग्णालयातील नवजात कक्षात शॉर्टसर्किटची घटना मागच्या आठवड्यात घडली होती. सुदैवाने यात मोठी दुर्घटना घडली नाही. त्यानंतर नाशिक शहरातील अनेक रुग्णालयांच्या फायर ऑडिटचा प्रश्न निर्माण झाला होता. घटनेनंतर नाशिक शहरातील सामाजिक कार्यकर्ते अजीज पठाण यांनी नाशिक महानगरपालिकेच्या अग्निशमन विभागात माहितीचा अधिकार टाकत फायर ऑडिट बाबत माहिती मागविली होती. 

महापालिका प्रशासन झाले जागे 

दरम्यान शहरातील किती खाजगी आणि सरकारी रुग्णालयांमध्ये फायर ऑडिट करण्यात आले आहे; याची माहिती मागवली होती. यानंतर मिळालेल्या माहितीत सदरची धक्कादायक माहिती समोर आली आहे. आता महापालिका प्रशासनाकडून खाजगी रुग्णालयांना नोटिसा पाठविण्यास सुरुवात केली आहे. अर्थात महापालिकेच्या अधिकाऱ्यांना याबाबत गंभीरता आहे की नाही की नाशिक शहरात मोठी घटनांनंतर महापालिकेला जाग येईल असा प्रश्न आता सामान्य नागरिक उपस्थित केला जात आहे. 

एकूणच यासंदर्भात नाशिक महानगरपालिकेतील अग्निशामक आणि आपत्ती व्यवस्थापक राजेंद्र बैरागी यांची भेट घेतली असता त्यांनी या संदर्भात माहिती देण्यास टाळाटाळ केली. त्यामुळे नाशिक महापालिका शहरात असलेल्या रुग्णालयांचे आणि रुग्णांबाबत किती गंभीर आहे असा प्रश्न या निमित्ताने उपस्थित होत आहे. तब्बल २५० पेक्षा जास्त खाजगी आणि सरकारी रुग्णालयाचे फायर ऑडिट होत नसेल, तर हा प्रश्न गंभीर असल्याचं देखील याचिकाकर्त्यांनी सांगितलं.