Samruddhi Highway Accident: समृद्धी महामार्गावर पुन्हा अपघात; टायर फुटून कारची डिव्हायडरला धडक, ३ जण जखमी

मनोज जैस्वाल, साम प्रतिनिधी

वाशिम जिल्ह्यात समृद्धी महामार्गावर दुसरा अपघात झाला. टायर फुटल्याने कारने महामार्गावरील दुभाजकाला धडकली. या अपघातात एकाच कुटुंबातील तीन जण जखमी झालेत. हा अपघात वाशिमच्या कारंजा तालुक्यातील दोनद लोकेशन १७५ वर झाला. या अपघातात पती,पत्नीसह मुलगा जखमी झाला आहे.

पुणे येथील भलमे कुटुंबीय कारने समृद्धी महामार्गावरून नागपूरला जात होते. अचानक धावत्या कारचा समोरील टायर फुटल्याने चालकाचे नियंत्रण सुटून कार दुभाजकावर धडकली. डॉ. नितीन विठ्ठलराव भलमे (४८), प्रियंका नितीन भलमे (३७ ) व दानिश नितीन भलमे ( रा.बालेवाडी पुणे) जखमी झालेत. तर मृणाल भलमे (१४) ही सुखरूप बचावली. अपघाताची माहिती श्री गुरु मंदिर रुग्णवाहिकेचे रुग्णसेवक रमेश देशमुख यांना समजताच त्यांनी जगद्गुरु नरेंद्राचार्य स्वामी महाराज रुग्णवाहिकेचे चालक नितीन पाटील यांना घटनास्थळी रवाना केले.

तेथून जखमींना उपचारासाठी येथील उपजिल्हा रुग्णालयात आणण्यात आले होते. येथे त्यांच्यावर वैद्यकीय अधिकाऱ्यांनी उपचार केले. त्यावेळी हायवे एचएसपी महाराष्ट्र सुरक्षा रक्षक व कारंजा लोकेशन समृद्धी अग्निशामक दल हे प्रामुख्याने घटनास्थळी उपस्थित होते.

ट्रक-कारच्या भीषण अपघातात बाप-लेकाचा जागीच मृत्यू

वाशिममध्ये महामार्गावर उभ्या असलेल्या ट्रकला कारने धडक दिली. या भीषण अपघातामध्ये दोन जणांचा जागीच मृत्यू झाला. या अपघातामध्ये ३ जण जखमी झालेत. मृतांमध्ये वडील आणि मुलाचा समावेश आहे. हा अपघात इतका भीषण होता की कारचा चक्काचूर झाला. समृद्धी महामार्गावर सकाळी ११.४५ वाजता हा अपघात झाला.

ट्रकमध्ये बिघाड झाल्यामुळे चालकाने महामार्गाच्या कडेला ट्रक उभा केला होता. याचवेळी पाठीमागून आलेल्या भरधाव कारने ट्रकला जोरदार धडक दिली. वाशिमच्या मंगरूळपीर तालुक्यातील लोकेशन २१८ वर हा अपघात झाला. या अपघातामध्ये कारमधील दोघांचा मृत्यू झाला.

सिमेंट वाहतूक करणारा टँकर पलटी

मुंबई गोवा महामार्गावर हळवल फाटा येथे मुंबईहून गोव्याच्या दिशेने सिमेंट वाहतूक करणारा टँकर रस्त्याच्या डाव्या बाजूला पलटी झाला. चालकाला वळणाचा अंदाज न आल्याने हा अपघात घडला अपघातात टँकरच्या दर्शनी भागाचे मोठे नुकसान झाले. तर सुदैवाने यामध्ये कोणालाही गंभीर दुखापत झाली नाही. चालकाला किरकोळ दुखापत झाल्यामुळे कणकवली उपजिल्हा रुग्णालयात दाखल करण्यात आले.