Wardha Accident: कुंभमेळ्याला जाणाऱ्या भाविकांचा अपघात; उभ्या ट्रकला एकावर एक धडकल्या २ कार; वाहनांचा चेंदामेंदा

चेतन व्यास, साम प्रतिनिधी

नादुरुस्त स्थितीत सिमेंट भरुन असलेल्या ट्रकला मागाहून येणाऱ्या दोन कार धडकल्याची घटना हैद्राबाद ते नागपूर महामार्गावर झालीय. या धडकेत एका कारचा चेंदामेंदा झालाय. या विचित्र अपघातात दोन्ही कारमधील सहा जण जखमी झालेत. हा अपघात हैद्राबाद ते नागपूर महामार्गावर जसापूर शिवारात झाला. या दुर्घटनेत एका कारमधील सात प्रवाशांपैकी आदित्य राज (२०), कल्पना कटरला (२०),रिशिका (२२) सर्व रा. हैदराबाद हे गंभीर जखमी झाले.

तसेच दुसऱ्या टेम्पो ट्रॅव्हलरमधील एकूण १२ प्रवाशांपैकी नरसिंह मल (४०), अमरनाथ रेड्डी (५०) दोन्ही रा. जहीराबाद तेलंगणा आणि गणेश अभंग सुरवशे (४२) हे किरकोळ जखमी झालेत. हे सर्व हैदराबाद ते प्रयागराज कुंभमेळ्याला जात होते. ट्रक चालक मोहम्मद अखिल मोहम्मद लल्लू (२१ रा. पडोली चंद्रपूर)हा ट्रकमध्ये सिमेंट भरुन चंद्रपूर ते नागपूर महामार्गाने जात होता.

जसापूर शिवारात ब्रेक डाऊन झाल्याने ट्रक फर्स्ट लेनवर नादुरुस्त स्थितीत उभा होता. हैदराबाद ते प्रयागराज जात असलेल्या कार चालकाला समोरील वाहन दिसून न आल्याने कार थेट नादुरुस्त स्थितीत असलेल्या ट्रकवर जाऊन धडकली. काही वेळाने मागाहून येणारा टेम्पो ट्रॅव्हलर वाहन प्रयागराज जात असतानाच कार निष्काळजीपणे चालवून अपघातग्रस्त कारवर जाऊन धडकली.

अपघाताची माहिती मिळताच जाम महामार्ग पोलिसांनी अपघातस्थळ गाठून हायवे रुग्णवाहिकेने जखमींना समुद्रपूर येथील शासकीय रुग्णालयात उपचारार्थ नेले. पोलिस निरीक्षक संतोष सपाटे यांच्या मार्गदर्शनात पोलिस उपनिरीक्षक भय्याजी ताेडसे, विकास काकडे, रंजीत फाले, प्रदीप डोंगरे, यांनी वाहतूक वळवून अपघातग्रस्त वाहने हायड्राच्या सह्याने सुरक्षित ठिकाणी हलवून महामार्गावरील वाहतूक सुरळीत केली.

पुणे-बंगळुरु राष्ट्रीय महामार्गावर एसटी बसचा भीषण अपघात

सांगलीच्या पुणे-बंगळुरु राष्ट्रीय महामार्गावर भीषण अपघात घडला असून एसटी बस पुलावरून खाली कोसळल्याने 35 प्रवासी जखमी झालेत. जखमींना तातडीने इस्लामपूर येथील खासगी रुग्णालयात उपचारासाठी दाखल करण्यात आलेत. ही एसटी बस साताऱ्यातील दहिवडी आगाराची असून कोल्हापूरच्या जोतिबा डोंगराला जात होती. बस महामार्गावर असताना चालकाचा गाडीवरील ताबा सुटला, त्यामुळे बसने पुलाचा कठडा तोडून थेट ओढ्यात कोसळली.