Wardha News: येरणवाडी- शिरूर शिवारात वाघाच्या पायाचे ठसे; वनविभागाकडून परिसराची पाहणी

चेतन व्यास 

वर्धा : जिल्ह्यातील येरणवाडी- शिरूर शिवारात आज वाघाच्या पायाचे ठसे दिसून आले आहेत. यामुळे परिसरातील (Wardha) नागरिकांमध्ये भीतीचे वातावरण निर्माण झाले असून, वन विभागाला याबाबत माहिती देण्यात आली. यानंतर वन विभागाच्या (Forest Department) पथकाने परिसरात पाहणी केली आहे. (Breaking Marathi News) 

वर्धा जिल्ह्यातील भागात मागील गेल्या दोन- तीन दिवसांपासून जोरदार पाऊस झाला. दोन- तीन दिवसांपासून जोरदार पाऊस सुरू असल्याने शेत शिवारातील कामे प्रभावित झाली आहे. अशातच आज सकाळी येरणवाडी- शिरूर शिवारामध्ये (Tiger) वाघाच्या पायाचे ठसे दिसून आल्याने शेतकरी आणि शेतमजुरांमध्ये भीतीचे वातावरण निर्माण झाले आहे. हिंगणघाट तालुक्याच्या अल्लीपूरलगतच्या येरणवाडी- शिरूर शिवारामध्ये वाघाच्या पायाचे ठसे आढळून आल्याची बातमी वाऱ्यासारखी परिसली. 

शेतकऱ्यांमध्ये चिंतेचे वातावरण 

वाघाच्या पायाचे ठसे असल्याचे समजल्याने आता शेतात जायचे कसे? जनावरेही चारायला सोडायची कशी? असे अनेक प्रश्न उभे ठाकले आहे. माहिती मिळताच वन विभागाच्या वनपाल सयाम व वनरक्षक शिवाजी राठोड यांनी घटनास्थळी दाखल होऊन वाघाच्या पायाच्या ठशांची पाहणी केली. तसेच हिंगणघाट मार्गाने जाणाऱ्या प्रवाशांनी दक्षता घ्यावी. आसपासच्या गावातील नागरिकांनी सतर्कता बाळगावी, अशा सूचना वनविभागाकडून देण्यात आल्या आहे.