Wardha News : वर्धेच्या आलोडी परिसरात आढळले बिबट्याच्या पायाचे ठसे; वन विभागाकडून परिसरात पाहणी

चेतन व्यास

वर्धा : वर्धा शहराला लागून असलेल्या आलोडी परिसरात बिबट्याच्या पायाचे ठसे आढळल्याने परिसरात खळबळ उडाली आहे. परिसरातील नागरिकांना हे ठसे दिसून आल्यानंतर याबाबत वन विभागाला याची माहिती देण्यात आली. यानंतर वन विभागाच्या टीमने येथे जाऊन पाहणी केली आहे. तसेच परिसरातील नागरिकांना सतर्क राहण्याचा इशारा दिला आहे.

वर्धा (Wardha) शहरापासून जवळ असलेल्या आलोडी परिसर हा जंगलाचा परिसर आहे. वर्धा शहराला लागून असल्याने आता वन्य प्राणी हे आपले अधिवास सोडून शहराकडे वळत असल्याचे दिसून येत आहे. याच दरम्यान रात्रीच्या सुमारास काही नागरिकांना या परिसरात बिबट्याच्या (Leopard) पायाचे ठसे आढळून आले. याबाबत तातडीने वर्धेच्या वन विभागाला माहिती देण्यात आली. वन विभागाच्या पथकाने घटनास्थळ गाठत पाहणी करत बिबट्याचे ठसे असल्याची खात्री केली. 

दरम्यान वन विभागाने (forest Department) आलोडी, साटोडा व कारला परिसरातील नागरिकांना सतर्क राहण्याचा इशारा दिलाय. रात्रीपासून वन विभागाचे पथक हे बिबट्याच्या मागावर असून त्याचा शोध घेत आहे. यासाठी काही ठिकाणी ट्रॅप कॅमेरे देखील लावण्यात आले आहेत.