Wardha : झोपेतच मृत्यूने गाठले; कुटुंबांवर मोठा आघात, मुसळधार पावसाने घराचे छत कोसळून दुर्घटना

चेतन व्यास 
वर्धा : रात्री झालेल्या मुसळधार पावसामुळे पुलगाव जवळच्या नाचणगाव येथील बडे प्लॉट परिसरातील एका कुटुंबावर दुःखाचा डोंगर कोसळला आहे. रात्रीच्या सुमारास सततच्या पावसामुळे एका घराचे छत अचानक कोसळले. या घटनेत 32 वर्षीय तरुणाचा छताखाली दबून झोपेतच मृत्यू झाल्याची हृदयद्रावक घटना घडली आहे. 

वर्धा जिल्ह्यातील नाचणगाव येथील किरण बाबाराव भुजाडे (वय ३२) असे छताखाली दबून मृत्यू झालेल्या तरुणाचे नाव आहे. दरम्यान वर्धा जिल्ह्यात देखील पुन्हा एकदा मुसळधार पावसाने हजेरो लावली आहे. या पावसामुळे प्रचंड नुकसानीची झळ अनेकांना बसली आहे. यातच पुलगाव जवळच्या नाचणगाव येथे रात्रीच्या सुमारास घराचे छत कोसळून दुर्घटना घडली आहे. यामुळे गावात खळबळ उडाली आहे. 

तरुणाचा जागीच मृत्यू 
रात्रीच्या वेळी संपूर्ण कुटुंब झोपलेले होते. परिवार गाढ झोपेत असताना अचानक टीनाचे छप्पर, सिलिंग फॅन व छतावरील दगड कोसळले. यात किरण भुजाडे हे थेट छताखाली दबले गेले. यामध्ये किरन यांना गंभीर दुखापत झाली असून ते घटनास्थळीच मरण पावले. तर मागील खोलीमध्ये त्यांचे आई- वडील व मुले झोपलेले होते. यामुळे या दुर्घटनेत त्यांचा जीव थोडक्यात बचावला. 

मदतीची मागणी 

पत्र आणि दगड पडल्याचा आवाज झाल्याने परिवार आणि आजूबाजूचे नागरिक जागे झाले. यानंतर छताखाली दबलेल्या किरण यास बाहेर काढण्यात आले. या अपघाताने संपूर्ण नाचणगाव परिसरात शोककळा पसरली आहे. तर पावसामुळे अनेक ठिकाणी नुकसान झाले असून पीक व घरांचे मोठे नुकसान होत आहे. अशा घटनांमध्ये मृत्यू झालेल्या कुटुंबाला तत्काळ आर्थिक मदत मिळावी, अशी मागणी ग्रामस्थांकडून करण्यात येत आहे.