Viral Video : सावधान! अकोल्यात बनतोय गटाराच्या पाण्यातून नाश्ता; Video पाहून तुम्हीही घाबराल

अक्षय गवळी, अकोला

चमचमीत खाणं कोणाला आवडत नाही. मात्र ते कुठे खावं याची काळजी प्रत्येकाने घेणं गरजेचं असतं. रस्त्यावर विकला जाणारा प्रत्येक पदार्थ हा कशा पद्धतीने बनवला जातो याची कल्पना आपल्याला नसते. या पदार्थांमुळे आपल्या आरोग्यावर दुष्परिणाम होऊ शकतात. काही दिवसांपूर्वी मुंबईतील विरारमध्ये एका मासे विक्रेत्याने मास्यांवरती मच्छर मारण्याचा स्प्रे फवारल्याचं पाहायला मिळालं. त्यानंतर आता अकोल्यात नाल्याच्या पाण्याचा वापर करून चक्क पहाटेचा नाश्ता बनवला जात असल्याचे धक्कादायक दृश्य समोर आले आहे. याचा व्हिडिओ देखील व्हायरल झाला आहे.

मिळालेल्या माहितीनुसार, अकोल्यातील धीग्रा चौकात असणाऱ्या बस स्थानक परिसरातील हा व्हिडिओ आहे. या चौकात पहाटे ४ वाजल्यापासून पोहे, समोसा, कचोरी नाश्त्याचे अनेक हात गाडीवर दुकाने थाटले जातात. या ठिकाणी अकोलेकरांची पहाटे मोठी गर्दी असते. मात्र, याच पोहे बनवणाऱ्या नाश्त्याच्या गाडीवर नाल्याच्या पाण्याचा वापर होत असल्याचा हा व्हिडिओ सध्या सोशल मीडियावर वायरल होत आहे.

या नाश्त्याच्या हात गाडीवरील काम करणारा एक व्यक्ती हातात प्लास्टिकची बाटली घेत सांडपाण्याच्या नाल्यातून पाणी भरतानाचा हा व्हिडिओ समोर आला आहे. दरम्यान, आज सकाळी सात वाजताच्या सुमाराचा हा व्हिडिओ असल्याचे म्हटलं जात आहे. दरम्यान, या हात गाडीवर या पाण्याचा वापर नाश्ता बनवण्यासाठी अथवा नाश्त्याच्या प्लेट धुण्यासाठी होत आहेय का? असा सवाल या निमित्ताने उपस्थित होत आहे. सोशल मीडियावर तीव्र संताप नास्ता विक्रेत्यांबाबत व्यक्त करण्यात येत होता.