शिवसेना फुटीनंतर उद्धव ठाकरेंनी टाकला टॉप गिअर; खासदारांच्या बंडखोरीनंतर उचललं सर्वात मोठं पाऊल

संजय राठोड, साम टीव्ही

शिवसेना ठाकरे गटात आता घडामोडींना प्रचंड वेग आला आहे. यवतमाळचे खासदार संजय देशमुख यांच्या बंडखोरीनंतर पक्षाला भगदाड पडू नये आणि संघटना मजबूत राहावी, यासाठी स्वतः पक्षप्रमुख उद्धव ठाकरे आता मैदानात उतरणार आहेत. येत्या 27 जून रोजी उद्धव ठाकरे यवतमाळ दौऱ्यावर जाणार आहेत.

बंडखोरीनंतर डमेज कंट्रोलवर भर

ऑपरेशन टायगर अंतर्गत 9 पैकी 6 खासदार फुटल्यानंतर देशाच्या राजकारणात मोठी खळबळ उडाली. हे सर्व खासदार एकनाथ शिंदे यांच्या शिवसेनेत प्रवेश करणार असल्याने ठाकरे विरुद्ध शिंदे हा संघर्ष अधिक तीव्र झालाय. शिवसेनेच्या वर्धपान दिनाच्या दिवशी उद्धव ठाकरे यांनी या फुटलेल्या खासदारांच्या मतदारांची जाहीर माफी मागितली. याच पार्श्वभूमीवर स्थानिक कार्यकर्त्यांमधील आणि पदाधिकाऱ्यांमधील संभ्रम दूर करण्यासाठी थेट यवतमाळमध्ये येऊन परिस्थिती हाताळणार आहेत. हा दौरा प्रामुख्याने डॅमेज कंट्रोल आणि संघटनात्मक बांधणीसाठी अत्यंत महत्वाचा मानला जात आहे.

उद्धव ठाकरे यवतमाळमधील सर्व प्रमुख आणि स्थानिक पदाधिकाऱ्यांची महत्वपूर्ण बैठक घेणार असून त्यांच्याशी थेट संवाद साधणार आहेत. बंडखोरीमुळे कार्यकर्त्यांचे मनोबल खचू नये यासाठी ठाकरे स्वतःत्यांना मार्गदर्शन करून पक्षात नवी ऊर्जा निर्माण करणार आहेत.

संजय देशमुखांच्या बंडखोरीनंतर उद्धव ठाकरे यांचा हा पहिलाच यवतमाळ दौरा असल्याने, सर्वांचे लक्ष या दौऱ्याकडे आणि यवतमाळात होणाऱ्या या महत्त्वपूर्ण बैठकीकडे लागले आहे. उद्धव ठाकरे या बैठकीत नेमका काय निर्णय घेतात आणि कोणती नवी रणनीती आखतात, हे पाहणे उत्सुकतेचे ठरेल.