Maharashtra Politics :...म्हणून विरोधीपक्षनेते पद हवंय; हिवाळी अधिवेशनात उद्धव ठाकरे आक्रमक

विधानभवनातील विरोधी पक्षनेतेपदाच्या निवडीवरून शिवसेना पक्षप्रमुख उद्धव ठाकरे यांनी आक्रमक भूमिका घेतली आहे. विधानसभा अध्यक्षांना पत्र देऊनही निर्णय घेण्यात न आल्याचे उद्धव ठाकरे यांनी सांगितले. विधासनभा अध्यक्षांनी विरोधीपक्षनेते पदाचा लवकरात लवकर निर्णय घ्यावा, अशी ठाकरेंनी आग्रही मागणी केली आहे. ते नागपुरात बोलत होते.

नागपुरात हिवाळी अधिवेशन सुरू आहे. या अधिवेशनासाठी उद्धव ठाकरे नागपुरात आहेत.या अधिवेशनादरम्यान उद्धव ठाकरे यांनी विधानसभा अध्यक्ष राहुल नार्वेकर यांची भेट घेतली. या भेटीदरम्यान त्यांनी विरोधीपक्षनेते पदाच्या निवडीवर चर्चा केली. यानंतर घेतलेल्या पत्रकार परिषदेत ठाकरेंनी विरोधीपक्ष पदाच्या निवडीचा प्रश्न अधोरेखित केला.

उद्धव ठाकरे म्हणाले, 'दोन्ही सभागृहाला विरोधीपक्षनेते नाहीत. महाराष्ट्राच्या अधिवेशनातील हे पहिले अधिवेशन असेल, जिथे दोन्ही सभागृहात विरोधीपक्षनेते नाहीत. तसं पाहिलं तर विधानसभेच्या निवडणुकीनंतर विधानभवनातील विरोधीपक्षनेते पदासाठी भास्कर जाधव यांच्या नावासहित पत्र दिलं होतं. त्यावर अजूनही निर्णय झालेला नाही'.

'विधानपरिषदेतील पद रिक्त झालं, त्याचंही पत्र गेलं. पण त्याचा अद्याप निर्णय झालेला नाही. आम्ही विधानसभा अध्यक्षांकडे विनंती केली आहे. सभापतींकडे जाऊनही याविषयी चर्चा केली. दोन दिवसांत या अधिवेशनाचा शेवटचा दिवस असेल. त्यांनी सांगितलं की, आम्ही लवकरात लवकर निर्णय घेऊ. हे गेल्या अधिवेशनातही बोललं गेलं होतं. परंतु याबाबत कधी निर्णय घेतला जाईल. हे पाहावे लागेल. दोन्ही विधानसभेला विरोधीपक्षनेते लाभावेत,अशी इच्छा ठाकरेंनी बोलून दाखवली.

'विरोधाला विरोध म्हणून पद नको आहे. पण जनतेच्या प्रश्नांसाठी विरोधीपक्षनेते पद हवंय. त्यांचा आवाज उठवण्यासाठी पद हवं आहे. विरोधीपक्षाला एक पद असतं. एक दर्जा असतो. तो प्रशासकीय अधिकाऱ्यांशी बोलू शकतो. सभागृहात आपल्या प्रश्नांची मांडणी व्यवस्थित करू शकतो. म्हणून लोकशाही जिवंत ठेवण्यासाठी हे पद असणं गरजेचे आहे. ते पद आहे. ती नेमणूक लवकरात लवकर व्हावी, अशी आग्रहाची मागणी ठाकरेंनी केली.