Uddhav Thackeray Speech In Khed: शिवसेना नेते रामदास कदम यांचा बालेकिल्ला असलेल्या खेडमध्ये गोळीबार मैदानात आज उद्धव ठाकरे यांची सभा होत आहे. या सभेत उद्धव ठाकरेंनी मुख्यमंत्री एकनाथ शिंदे यांच्यासह चाळीस आमदारांवर हल्लाबोल केला. दिल्लीसमोर शेपट्या आत घालुन बसणे हे बाळासाहेबांचे विचार नव्हते अशा शब्दात उद्धव ठाकरे यांनी शिंदेंवर निशाणा साधला.
उद्धव ठाकरे म्हणाले, मी घरात राहुन जो महाराष्ट्र सांभाळला तो तुम्हीं घरोघरी जाऊन, गुवाहाटीला फिरुन सांभाळु शकत नाही आहात. दिल्लीत मुजरे मारायला जाण्यात अर्ध आयुष्य जातय आणि ज्याना मंत्रीपद दिली नाहीत त्यांना सांभाळताना उरलेल जातंय अशी टीका उद्धव ठाकरेंनी मुख्यमंत्री शिंदेंवर केली आहे.
ठाकरे म्हणाले, सगळे उद्योगधंदे गुजरातला जात होते, कारण गुजरातमध्ये निवडणुका होत्या. आता परवा आयफोनचा प्रकल्प कर्नाटकला गेलाय, कारण आता तिकडे निवडणुका होणार आहेत. हे तुटलेल्या फुटलेल्या एसटीवर हासरे चेहरे टाकुन जाहिराती करत आहेत. माझ्या वेळेस 'माझ कुटुंब, माझी जबाबदारी' ही एकच घोषणा होती, कारण हे महाराष्ट्र माझं कुटुंब आहे, असेही उद्धव ठाकरे म्हणाले.
मी अभिमानाने सांगतो मी बाळासाहेबांचा पुत्र आहे, माझे वडील अभिमानाने सांगत होते मी प्रबोधनकारांचा पुत्र आहे. आज ठाकरेंची सहावी पिढी महाराष्ट्राची सेवा करत आहे. तुमची वंशावळ सांगा असा टोला त्यांनी भाजपला लगावला.
यावेळी उद्धव ठाकरे उपस्थित कार्यकर्त्यांना उद्देशून म्हणाले. तुम्हांला शिवसेनेचा पक्षप्रमुख मिंधे चालेल का? हे तुम्हीं सांगायचं, निवडणूक आयोगाने नाही. आजपासून आशीर्वाद यात्रा काढत आहेत. तसेच तुम्हीं चोराला आशीर्वाद देणार का? असा प्रश्नही त्यांनी विचारला. (Latest Marathi News)
पुढे बोलताना ठाकरे म्हणाले, मिंधेच्या हाती धनुष्यबाण होता आणि चेहरा गुन्हेगारासारखा होता. तुमच्या हाती धनुष्यबाण घेण्याचा प्रयत्न करा पण कपाळावर गद्दार आणि हातावर 'मेरा खानदान चोर हैं' हे लिहिलं आहे, ते या जन्मात पुसलं जाणार नाही. तुमच्यासारखे किती आले तरी शिवसेना टिकुन राहणार आहे अशा शब्दात ठाकरेंनी त्यांनी नाव न घेता मुख्यमंत्र्यांवर केली.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
