Thackeray: '..म्हणून आम्ही एकत्र आलो'; राज ठाकरेंसोबत एकत्र येण्याचं उद्धव ठाकरेंनी सांगितलं कारण

सध्या राज्यात विनाअनुदानित शिक्षकांच्या आंदोलनाने पेट घेतला आहे. गेल्या चार दिवसांपासून आझाद मैदानावर शिक्षकांचे आंदोलन सुरू असून, त्यांच्या मागण्यांना पाठिंबा देण्यासाठी अनेक नेतेमंडळी मैदानात उतरली आहेत. शरद पवार, सुप्रिया सुळे यांच्यानंतर बाळा नांदगावकर आणि उद्धव ठाकरेही आंदोलनस्थळी पोहोचले. यावेळी त्यांनी शिक्षकांशी संवाद साधला. तसेच विविध मुद्द्यांवर भाष्य केलं. केवळ शिक्षकांच्या मागण्या नव्हे तर, मराठी अस्मितेचा मुद्दा आणि राज - उद्धव ठाकरे एकत्र का आले? यावरही त्यांनी भाष्य केलंय.

१६०० एकर मुंबईची जागा अदानीच्या घशात टाकली

उद्धव ठाकरेंनी भाषणादरम्यान धारावी आणि अदानीचा मुद्दा उपस्थित केला, 'विकासाच्या नावाखाली धारावीकरांना अपात्र करून बाहेर काढण्यात येत आहे. आजपर्यंत धारावीकडे कुणाचंही लक्ष नव्हतं. मात्र, आता धारावी अदानीच्या घशात घातली. १६०० एकर मुंबईची जागा अदानीच्या घशात टाकलीय', असा थेट आरोप उद्धव ठाकरेंनी केला.

यावेळी त्यांनी गिरणी कामगारांचाही मुद्दा उपस्थित केला. 'आज गिरणी कामगारांची दुसरी - तिसरी पिढी आहे. पूर्वीच्या काळी संप झाला. जे काही ठरलं होतं, ते गिरणी कामगारांना मिळालं नाही. कामगारांच्या उरावर टॉवर उभं केलंय. गिरणी कामगारांना धारावी आणि मदर डेअरीच्या जागी जागा द्या. अदानीला टॉवर शेलू वांगणीला बांधू द्या. देवनार डंपिंगवर त्यांना बांधू द्या', असं उद्धव ठाकरे म्हणाले.

तसेच 'गिरणी कामगार, पोलीस आणि सफाई कामगारांना हक्काची जागा द्या, ज्यांच्यामुळे मुंबई आहे, त्यांना हक्काची जागा द्या', असंही उद्धव ठाकरे म्हणाले.

नतद्रष्टासारखे भांडत बसू का?

'आम्ही दोन्ही भाऊ एकत्र आलो, कशासाठी आलो. आम्ही आमच्या राजकीय पोळ्या भाजत बसलो असतो. पण नाही. प्रबोधनकारांचे आम्ही दोन्ही नातू आहोत. माझे आजोबा, बाबा आणि माझे काका श्रीकांत ठाकरे हे तिघंही संयुक्त महाराष्ट्राच्या लढ्यात होते. आमच्या डोळ्यात देखत मुंबई तोडली जात असेल, मराठी माणूस भरडला जात असेल, तर आम्ही नतद्रष्टासारखं भांडत बसू का? आम्ही आमच्यातील भांडणं मिटवून टाकली..' असं उद्धव ठाकरे म्हणाले.