धुळवडीसाठी ४ मित्र कारने निघाले, वाटतेच काळाचा घाला; बीडमध्ये भयंकर अपघात

योगेश काशिद, साम टीव्ही

बीडमध्ये भीषण अपघाताची घटना घडली आहे. धुळवडीसाठी कारने निघालेल्या मित्रांचा भीषण अपघात झाला. या अपघातात एकजण जागीच ठार झाला आहे. तर तिघेजण जखमी झाले आहेत. बीड ते शिरूर रोड परिसरात ही घटना घडली आहे. अपघाताच्या घटनेने रस्त्यावर एकच खळबळ उडाली.

मिळालेल्या माहितीनुसार, धुळवड साजरी करण्यासाठी निघालेल्या बीडमधील तरुणांच्या कारला भीषण अपघात झाल्याने एक जण जागीच ठार झाला. तर तिघे जखमी झाले. ही घटना बीड ते शिरूर रोडवर रायमोहजवळ घडली. कृष्णा मुळे असे अपघातात ठार झालेल्या तरुणाचे नाव आहे. कृष्णा हा आपल्या मित्रांसोबत धुळवडीचा सण साजरा करायला वाटरपार्कला जात होता.

नेमका कसा घडला अपघात?

बीडमधील मित्र मध्यरात्री कारने बीड ते शिरूर रोडवरून जाताना चालकाचे गाडीवरील नियंत्रण सुटले. त्यामुळे ही कार रस्त्याच्या बाजूला उलटून थेट एका विहिरीच्या कठड्याला जाऊन धडकली. सुदैवाने ही गाडी विहिरीत पडली नाही. परंतु या भीषण अपघातात कृष्णा मुळे हा जागीच ठार झाला. तर प्रसाद खोले, यश पेंढारे आणि अन्य एक जण यामध्ये जखमी झाले. या कारच्या पाठीमागे त्यांच्याच मित्रांची आणखी एक कार होती. त्या कारमधील मित्रांनी जखमींना तातडीने बीड येथील खासगी रुग्णालयात दाखल केले. अपघातामधील जखमींवर सध्या उपचार सुरू आहेत.

दरीत पाय घसरून पडल्याने कामगाराचा जागीच मृत्यू

सातारा शहरालगत असलल्या अजिंक्यतारा किल्ल्यावर दगड फोडण्याचे काम करणाऱ्या मजुराचा दोनशे फूट खोल दरीत पाय घसरून पडल्याने एका मजुराचा जागीच मृत्यू झाल्याची घटना घडली. या अपघाताची माहिती मिळताच पोलिसांनी छत्रपती शिवेंद्रराजे ट्रेकर्सच्या मदतीने दोनशे फूट खोल दरीतून मजुराचा मृतदेह बाहेर काढण्यात आला. या घटनेची नोंद सातारा शहर पोलीस ठाण्यात करण्यात आली आहे.