Supriya Sule : पांडुरंगाला मी मटण खाल्लेलं चालतं, तुम्हाला काय प्रॉब्लेम: सुप्रिया सुळेंचं वक्तव्य, मुख्यमंत्र्यांची प्रतिक्रिया | VIDEO

अभिजीत सोनावणे, साम टीव्ही, प्रतिनिधी

Nashik : स्वातंत्रदिनी कल्याण-डोबिंवलीसह राज्यात अनेक ठिकाणी मांसविक्री बंदीचा निर्णय महापालिका प्रशासनाने घेतला होता. प्रशासनाच्या आदेशावरुन विरोधकांनी सत्ताधारी महायुती सरकारवर टीका केली होती. या प्रकरणावर आता सुप्रिया सुळे यांनी प्रतिक्रिया दिली आहे. सुप्रिया सुळे यांनी 'पांडुरंगाला मी मटण खाल्लेलं चालतं', असे वक्तव्य केले आहे.

नाशिकमधील दिंडोरीच्या खेडगावमध्ये महात्मा फुले यांच्या पुतळ्याच्या अनावरण कार्यक्रमाला सुप्रिया सुळे उपस्थित होत्या. कार्यक्रमात भाषण करताना त्यांनी सरकारला थेट सवाल केला. माझ्या पांडुरंगाला मी मटण खाल्लेलं चालतं, तर तुम्हाला काय प्रॉब्लेम? आम्ही आमच्या पैशाने मटण खातो, आम्ही कुणाचे मिंधे नाही, असे वक्तव्य सुप्रिया सुळे यांनी केले.

सुप्रिया सुळे यांनी क्रीडामंत्री (माजी कृषीमंत्री) यांच्यावर देखील खरमरीत टीका केली. पत्ते तुम्ही खेळायचे आणि कोर्टात चकरा आम्ही मारायच्या का? तुमची अब्रु तुमच्याच माणसाने घालवली. रोहित पवार यांना सारख्या नोटीसा येत असतात. आमचे रोहित घाबरत नाही, असे सुप्रिया सुळे यांनी भाषणादरम्यान म्हटले आहे.

केंद्रीय गृहमंत्री अमित शाह यांचे सुप्रिया सुळे यांनी आभार मानले. सुप्रिया सुळे म्हणाल्या, 'दहा वेळेस वेळ मागून देखील राज्याचे मुख्यमंत्री आम्हाला वेळ देत नाहीत. म्हणून आम्ही थेट दिल्लीत जाऊन अमित शाह यांची भेट घेतो.' त्यांनी विचारलेल्या 'पांडुरंगाला मी मटण खाल्लेलं चालतं, तर तुम्हाला काय प्रॉब्लेम आहे? या प्रश्नावर मुख्यमंत्री फडणवीस यांनी उत्तर दिले. 'मी देणार नाही, याचं उत्तर महाराष्ट्रातील तमाम वारकरी देतील', असे देवेंद्र फडणवीस म्हणाले.